రెపోరేటు 4%, వడ్డీ రేట్లు యథాతథం: RBI గవర్నర్ శక్తికాంతదాస్

రిజర్వ్ బ్యాంక్ ఆఫ్ ఇండియా వడ్డీ రేట్లను యథాతథంగా ఉంచింది. మానిటరీ పాలసీ కమిటీ (MPC) రెపో రేటును 4 శాతంగా ఉంచేందుకు ఓటు వేసింది. ఈ మేరకు ఆర్బీఐ గవర్నర్ శక్తికాంత దాస్ శుక్రవారం ప్రకటించారు. అక్టోబర్ 7వ తేదీ నుండి మూడు రోజుల పాటు ఆర్బీఐ MPC భేటీ అయింది. ఈ భేటీలో కీలక నిర్ణయాలు తీసుకున్నారు. ఇందులో భాగంగా వడ్డీ రేట్లు యథాతథంగా ఉంచాలని నిర్ణయించింది. రివర్స్ రెపో రేటు 3.35 శాతంగా నిర్ణయించింది.

రిటైల్ ద్రవ్యోల్బణం అధికంగానే ఉన్నందున ఈసారి కూడా రెపో రేటు యథాతథస్థితికి ప్రాధాన్యం ఇచ్చే అవకాశాలు ఉంటాయని ఆర్థిక నిపుణులు ముందుగానే అంచనా వేశారు. గత కొన్ని నెలలుగా సరఫరాలపరమైన లోపాల కారణంగా రిటైల్ ద్రవ్యోల్బణం 6 శాతం కన్నా ఎక్కువగా ఉంటోంది. రెపో రేటు నిర్ణయానికి MPC రిటైల్ ద్రవ్యోల్బణాన్ని పరిగణలోకి తీసుకుంటుంది. కాబట్టి కీలక వడ్డీ రేట్ల జోలికి వెళ్లలేదు.

ఆర్బీఐ మానిటరీ పాలసీ కమిటీ సమావేశం గత నెల 29న ప్రారంభం కావాల్సి ఉంది. కానీ ఇండిపెండెంట్ సభ్యుల నియామకం జరగకపోవటం పాటు కనీసం నలుగురు సభ్యుల కోరమ్ లేని కారణంగా సమావేశం వాయిదా పడింది. కమిటీలో చేతన్ ఘటే, పమీదువా, రవీంద్ర దోలకియాల నాలుగేళ్ల పదవీకాలం సెప్టెంబర్ 29వ తేదీన ముగిసింది. వీరి స్థానంలో ప్రముఖ ఆర్థికవేత్తలు అషిమా గోయల్, జయంత్ ఆర్ వర్మ, శషాంక్ బిడేలను నియమించింది. అనంతరం అక్టోబర్ 7 నుండి మూడు రోజుల పాటు భేటీ అయింది.