ఒకే కంపెనీలో 10 ఏళ్లు ఉండాలా? లేక పదేళ్లలో 10 ఉద్యోగాలు మారాలా? ఏది బెస్ట్?

గురుగ్రామ్‌లో నివసించే 26 ఏళ్ల ఒక మార్కెటింగ్ ప్రొఫెషనల్.. నాలుగేళ్లలో తన మూడవ ఉద్యోగానికి మారుతోంది. ప్రతి మార్పు ఆమెకు 40% జీతం పెంపును తెచ్చిపెట్టింది. మరోవైపు ముంబైలో 52 ఏళ్ల ఒక బ్యాంకర్.. గత 28 ఏళ్లుగా అదే సంస్థలో పనిచేస్తూ స్థిరత్వాన్ని, పెన్షన్ ప్లాన్‌ ను ఎంజాయ్ చేస్తున్నారు. ఈ రెండు విభిన్న తరాల ఆలోచనా విధానాలు చూస్తుంటే ఒక సందేహం వస్తుంది.. అసలు నేటి కాలంలో ఏది సరైన మార్గం? అని..

ఒకప్పుడు ఒకే చోట ఏళ్ల తరబడి పనిచేయడాన్ని నిబద్ధతగా చూసేవారు. కానీ నేడు ఉద్యోగాలు (Jobs) అంటే కేవలం జీవనాధారం మాత్రమే కాదు, నిరంతర ఎదుగుదలగా మారుతున్నాయి.

మారుతున్న కెరీర్ స్థిరత్వం

కెరీర్ స్థిరత్వం అంటే ఇప్పుడు ఒకే కంపెనీలో పదేళ్లు ఉండటం కాదు. లింక్డ్ఇన్ (LinkedIn) తాజా నివేదిక ప్రకారం, 72% మంది భారతీయ ప్రొఫెషనల్స్ 2026 లో తమ ఉద్యోగాలను మార్చాలని ప్లాన్ చేస్తున్నారు. 2024లో ఇది 88% గా ఉండటం గమనార్హం. అంటే యువతకు ఇప్పుడు కంపెనీల పట్ల విధేయత కంటే, తమ వ్యక్తిగత ఎదుగుదల, నైపుణ్యాల పైన ఎక్కువ నమ్మకం పెరిగింది.

ఏఐ (AI) , మారుతున్న మార్కెట్ వాస్తవాలు

టెక్నాలజీ, ముఖ్యంగా ఆర్టిఫిషియల్ ఇంటెలిజెన్స్ (AI), ఉద్యోగ మార్కెట్‌ ను పూర్తిగా మార్చేస్తోంది. 87% మందికి ఏఐ టూల్స్ వాడటం తెలిసినా, కొత్త ఉద్యోగం వెతకడం మాత్రం సవాలుగానే మారుతోంది. ఇప్పుడు రిక్రూటర్లు కేవలం మీ అనుభవాన్ని మాత్రమే చూడటం లేదు. మీరు కొత్త టెక్నాలజీని ఎంత వేగంగా నేర్చుకోగలరో గమనిస్తున్నారు. అందుకే నేడు ఉద్యోగం మారడం అనేది కేవలం జీతం కోసం మాత్రమే కాదు, మీ నైపుణ్యాలను అప్‌డేట్ చేసుకోవడానికి ఒక వ్యూహాత్మక అడుగు.

నైపుణ్యమే అసలైన పెట్టుబడి

గతంలో కంపెనీలు 'లాయల్టీ'కి విలువ ఇచ్చేవి. కానీ నేడు 'స్కిల్స్' (Skills) కి పట్టం కడుతున్నాయి. మార్కెటింగ్ అనలిస్ట్ అయినా, ప్రొడక్ట్ మేనేజర్ అయినా.. వారు తాము పనిచేసే కంపెనీని బట్టి కాకుండా, తమకున్న స్కిల్స్ బట్టి తమను తాము నిర్వచించుకుంటున్నారు. మీరు ఒక కంపెనీలో పదేళ్లు ఉన్నా, అక్కడ కొత్తగా ఏమీ నేర్చుకోకపోతే, మారుతున్న మార్కెట్‌లో మీరు వెనుకబడిపోయే ప్రమాదం ఉంది.

పోటీ పెరిగింది.. కానీ అవకాశాలూ ఉన్నాయి!

2022తో పోలిస్తే ప్రతి ఉద్యోగానికి దరఖాస్తు చేసే వారి సంఖ్య రెట్టింపు అయ్యింది. అంటే ఒక ఉద్యోగం (Job) సంపాదించడం ఇప్పుడు మరింత కష్టతరంగా మారింది. నిపుణుల కొరత ఉందని 74% మంది రిక్రూటర్లు చెబుతుంటే, ఉద్యోగం దొరకడం లేదని అభ్యర్థులు అంటున్నారు. ఈ వైరుధ్యానికి కారణం 'నైపుణ్యాల లోపం'. అందుకే నేటి తరం ప్రొఫెషనల్స్ స్టాగ్నేషన్‌కు భయపడి తరచుగా ఉద్యోగాలు మారుస్తూ తమను తాము షార్ప్‌గా ఉంచుకుంటున్నారు.

సక్సెస్ ఫుల్ కెరీర్ కోసం సూచనలు..

1. నిరంతర అభ్యాసం: ఏఐ వంటి కొత్త టూల్స్‌పై పట్టు సాధించాలి.
2. నెట్‌వర్కింగ్: కంపెనీలో ఉండగానే బయటి ప్రపంచంతో సంబంధాలు పెంచుకోవాలి.
3. ఫ్లెక్సిబిలిటీ: అవసరమైతే కెరీర్ మార్గాన్ని మార్చుకోవడానికి (Pivot) సిద్ధంగా ఉండాలి.
4. వ్యూహాత్మక నిర్ణయం: కేవలం 10% పెంపు కోసం కాకుండా, మీ రెజ్యూమెకు విలువనిచ్చే రోల్స్ కోసం మారాలి.

మొత్తంగా చెప్పాలంటే.. 10 ఏళ్ల కెరీర్ అనేది మాయమైపోలేదు. అది రూపాంతరం చెందింది. ఒకే చోట పదేళ్లు ఉన్నా, ప్రతి ఏడాది కొత్త నైపుణ్యాలను నేర్చుకుంటూ కంపెనీకి విలువను చేకూర్చగలిగితే అది గొప్ప విషయమే. అదే సమయంలో, కొత్త సవాళ్ల కోసం మారడం కూడా తప్పు కాదు. ఇక్కడ కాలం ముఖ్యం కాదు. మార్పు ముఖ్యం.