నీరవ్ మోడీ అప్పగింతకు బ్రిటన్ అంగీకారం, మరో చిక్కు!

పంజాబ్ నేషనల్ బ్యాంకు (PNB) స్కాంలో వజ్రాల వ్యాపారి నీరవ్ మోడీకి ఉచ్చు బిగిసింది. PNB నుండి దాదాపు రూ.14వేల కోట్లు తీసుకొని 2018లో విదేశాలకు పారిపోయిన నీరవ్‌ను భారత్‌కు అప్పగించేందుకు బ్రిటన్ ప్రభుత్వం అంగీకరించింది. సుదీర్ఘ విచారణ అనంతరం యూకే హోం సెక్రటరీ నీరవ్ మోడీని అప్పగిస్తామని తెలిపారు. ఇందుకు సంబంధించి ఉత్తర్వుపై బ్రిటన్ హోం శాఖ మంత్రి సంతకం చేసినట్లు భారత సీనియర్ దౌత్యవేత్తలు తెలిపారు. నీరవ్ కోసం ముంబైలోని ఆర్థర్ రోడ్డు జైలు సిద్ధంగా ఉంది. ఆయనను జైలులోని 12 బ్యారక్‌లో ఉంచనున్నారు.

బ్రిటన్ హోం మంత్రి ఉత్తర్వును నీరవ్ న్యాయపరంగా సవాల్ చేసే అవకాశాలు ఉన్నాయి. ఇందుకు సంబంధించిన అనుమతి కోసం ఆయన 14 రోజుల్లో దరఖాస్తు చేసుకోవచ్చు. PNB స్కాంలో మనీ లాండరింగ్ ఆరోపణలు ఎదుర్కొంటున్న నీరవ్ ప్రస్తుతం లండన్ నైరుతి ప్రాంతం వాండ్స్‌వర్త్ జైల్లో ఉన్నాడు. ఈ స్కాంపై నీరవ్ భారత న్యాయస్థానాలకు సమాధానం చెప్పాల్సిందేనని వెస్ట్‌మినిస్టర్ మేజిస్ట్రేట్ కోర్టు ఫిబ్రవరి 25న స్పష్టం చేసింది. అయితే ఆయన అప్పగింతకు సంబంధించిన ఉత్తర్వు జారీచేసే అధికారాన్ని బ్రిటన్ కేబినెట్ మంత్రికి వదిలేసింది.

భారత్‌కు అప్పగిస్తే తనకు న్యాయం జరగదని, మెడికల్ పరమైన అవసరాలకు ఇబ్బందులు ఎదుర్కోవాల్సి వస్తుందని నీరవ్ వాదించారు. అయితే ఈ వాదనలను అక్కడి కోర్టు కొట్టి వేసింది. భారత్‌కు అప్పగిస్తే నీరవ్‌కు అన్యాయం జరుగుతుందని చెప్పడానికి ఆధారాల్లేవని, మానవ హక్కుల విషయంలో ఆందోళన అవసరం లేదని స్పష్టం చేసింది.