ఒక బర్త్‌డే విష్ చెప్తే చాలు… రెండు దేశాల భవిష్యత్తు చర్చలకు దారి పడుతుందా!

కొన్ని నెలలుగా భారతదేశం-అమెరికా మధ్య వాణిజ్య తగవులు, సుంకాల వివాదాలు హాట్‌టాపిక్‌గా మారిపోయాయి. ఈ టెన్షన్ మధ్యే అమెరికా మాజీ అధ్యక్షుడు డొనాల్డ్ ట్రంప్, భారత ప్రధాని నరేంద్ర మోదీకి 75వ పుట్టినరోజు శుభాకాంక్షలు చెప్పడానికి ఫోన్ చేశారు. ఈ కాల్‌లో ఇద్దరూ పాత మిత్రుల్లా హాయిగా మాట్లాడుకున్నారు. చాలా కాలం తర్వాత మళ్లీ వీరి మధ్య స్నేహపూర్వక వాతావరణం కనిపించిందని చెప్పొచ్చు. ఒక పుట్టినరోజు విష్‌తోనే ఇద్దరి ఫ్రెండ్‌షిప్ మళ్లీ రీ-కనెక్ట్ అవుతున్నట్టుంది. వాణిజ్య ఉద్రిక్తతలతో చల్లబడిన సంబంధాలు... ఒక్క ఫోన్‌కాల్‌తో మళ్లీ కరిగిపోతున్నాయా అన్నట్లుంది.

ఇటీవలి వరకు ట్రంప్, భారత చమురు దిగుమతులపై సుంకాలను రెట్టింపు చేస్తూ ఢీ అంటే ఢీ అన్నట్టే వ్యవహరించారు. కారణం రష్యాతో భారత్ కొనసాగిస్తున్న చమురు ఒప్పందాలు. ఈ నిర్ణయం తర్వాత ఇరుదేశాల మధ్య సంబంధాలు బాగా కఠినతరమయ్యాయి. అయితే మంగళవారం జరిగిన ఈ పుట్టినరోజు కాల్‌తో పాటు, రోజంతా సాగిన వాణిజ్య చర్చలు వాతావరణాన్ని కొంచెం సాఫ్ట్ చేశాయి.

అమెరికా మాజీ అధ్యక్షుడు డొనాల్డ్ ట్రంప్, తన ట్రూత్ సోషల్ అకౌంట్‌లో నరేంద్ర మోదీ గురించి మాట్లాడుతూ, "నా మిత్రుడు ప్రధాని నరేంద్ర మోదీతో అద్భుతమైన ఫోన్ సంభాషణ జరిగింది... రష్యా-ఉక్రెయిన్ యుద్ధాన్ని ముగించేందుకు చేస్తున్న నా ప్రయత్నాలకు మీరు ఇస్తున్న మద్దతుకు ధన్యవాదాలు" అని రాశారు. దీనికి మోదీ కూడా వెంటనే స్పందిస్తూ, "మీ ఆప్యాయ శుభాకాంక్షలకు ధన్యవాదాలు. ఉక్రెయిన్ సమస్యకు శాంతియుత పరిష్కారం కోసం మీరు చేస్తున్న కృషికి మేము మద్దతు ఇస్తున్నాం" అని చెప్పారు.

సాధారణంగా పుట్టినరోజు కాల్ అంటే కేవలం శుభాకాంక్షలు గురించి మాట్లాడుకోవడం మాత్రమే ఉంటాయి. కానీ డొనాల్డ్ ట్రంప్-నరేంద్ర మోదీ సంభాషణ మాత్రం దానికి పూర్తిగా విరుద్ధంగా సాగింది. ఇద్దరి మాటల్లోనూ యుద్ధం, శాంతి, చమురు వాణిజ్యం వంటి గ్లోబల్ అంశాలే ప్రధానంగా వచ్చాయి. ముఖ్యంగా, ట్రంప్ ఇటీవల వ్లాదిమిర్ పుతిన్ను అలాస్కాలో, వొలోదిమిర్ జెలెన్స్కీని వాషింగ్టన్లో కలసిన తర్వాత మోదీతో ఈ తరహా చర్చ జరగడం మరింత ఆసక్తికరంగా అనిపించింది. అంటే పుట్టినరోజు విషెస్ అనే సింపుల్ కాల్‌లోనే జియోపాలిటిక్స్ కూడా మిక్స్ అయ్యిందన్నమాట.

డొనాల్డ్ ట్రంప్, జూన్‌లో "భారతదేశం-పాకిస్థాన్ కాల్పుల విరమణకు నేను మధ్యవర్తిని" అని చెప్పినప్పుడు, నరేంద్ర మోదీ బహిరంగంగానే ఆ వ్యాఖ్యలను ఖండించారు. అప్పట్లో భారత విదేశాంగ కార్యదర్శి విక్రమ్ మిస్రి కూడా "అలాంటి మధ్యవర్తిత్వం లేదా వాణిజ్య చర్చలు ఎప్పుడూ జరగలేదు" అని స్పష్టం చేశారు. అలాంటి పరిస్థితుల్లోనే ఇప్పుడు వీరిద్దరూ మళ్లీ డైరెక్ట్‌గా మాట్లాడుకోవడం గమనించదగ్గ విషయంగా మారింది.

సెప్టెంబర్ 6న ట్రంప్ భారత్-అమెరికా బంధాన్ని "ప్రత్యేక సంబంధం"గా పిలిచిన తర్వాత, మోదీ కూడా "దానికి గాఢ కృతజ్ఞతలు" తెలిపారు. సెప్టెంబర్ 10న ట్రంప్ వాణిజ్య చర్చలు విజయవంతం అవుతాయని విశ్వాసం వ్యక్తం చేయగా, మోదీ "ఇరుదేశాలు సహజ భాగస్వాములు" అని అన్నాడు. ఇప్పుడు ఈ పుట్టినరోజు కాల్‌తో ఆ మాటలు కేవలం మాటలుగానే కాకుండా, సంబంధాలు కూడా మళ్లీ సర్దుబాటు దిశగా వెళ్తున్నాయనే సంకేతాలు కనిపిస్తున్నాయి.

ఒక సాధారణ పుట్టినరోజు కాల్ కానీ దానిలో వాణిజ్య చర్చల గాలి, జియోపాలిటికల్ సిగ్నల్స్, స్నేహభావపు మాటలు అన్నీ కలిశాయి. ఇదే సరైన మలుపా? లేక కేవలం స్నేహమా? సమాధానం త్వరలో తెలుస్తుంది కానీ ఇప్పటికైతే మోదీ-ట్రంప్ జంట మళ్లీ స్నేహపూర్వక టోన్‌లోకి వచ్చినట్టే కనిపిస్తోంది.