IT News: అమెరికాను పట్టించుకోని భారత టెక్కీలు.. IT ఉద్యోగులు ఏ దేశానికి వెళ్తున్నారో తెలుసా?

IT News: భారత్ నుంచి వలసవెళ్లే వారి సంఖ్య ఏటా పెరుగుతోంది. వారిలో సాఫ్ట్వేర్ ఉద్యోగులు పెద్ద మొత్తంలో ఉంటారు. గతంలో ఎక్కువగా అమెరికాకు వెళ్లి సెటిల్ అయ్యేవారు. కానీ మారుతున్న పరిస్థితులకు అనుగుణంగా ఇప్పుడు టెక్కీల ఆలోచనా ధోరణిలో మార్పు వచ్చింది. అగ్రరాజ్యం అమెరికాను కాదని మరో దేశానికి మకాం మార్చేందుకు ఇండియన్స్ ప్రయత్నిస్తున్నారు.

ఉన్నత చదువులు, IT ఉద్యోగాల కోసం ఎక్కువమంది భారతీయులు.. అమెరికా, ఆస్ట్రేలియా, UK వంటి దేశాలకు వలస వెళ్తుంటారు. ఈమధ్య కాలంలో కెనడాకు వెళ్తున్న ఇండియన్స్ సంఖ్య పెరుగుతున్నట్లు పలు నివేదకలు స్పష్టం చేస్తున్నాయి. ముఖ్యంగా టెక్కీలకు కెనడా స్వర్గధామంగా మారుతున్నట్లు పేర్కొంటున్నాయి.

గత ఏడాది కాలంగా 15 వేల మంది కంటే ఎక్కువ మంది భారత IT నిపుణులు కెనడాకు వలస వెళ్లినట్లు ది టెక్నాలజీ కౌన్సిల్ ఆఫ్ నార్త్ అమెరికా గణాంకాలు చెబుతున్నాయి. ఇక మొత్తం విదేశాలకు వెళ్లిన వారి సంఖ్య అయితే 32 వేలకు పైమాటే. కెనడాలో పెద్ద మొత్తంలో టెక్ కంపెనీలు విస్తరిస్తుండగా.. IT ఉద్యోగులకు భారీగా జీతాలు ఆఫర్ చేస్తున్నాయి.

దేశీయ IT రంగం మంచి వృద్ధితో దూసుకుపోతుండటంతో.. ఇక్కడ టెక్ పరిశ్రమలో నిపుణులకు కొరత లేదు. ఈ నైపుణ్యాన్ని మెచ్చిన పలు కంట్రీస్.. తమ దేశానికి రారమ్మంటూ గ్రీన్ కార్పెట్ పరిచి మరీ ఆహ్వానం పలుకుతున్నాయి. మంచి జీతంతో పాటు లగ్జరీ లైఫ్ మీద ఆశతో టెక్కీలు కూడా ఆ దిశగా ఆసక్తి చూపిస్తున్నారు.