ఇండియా ఎకానమీపై చమురు ధరల ప్రభావం

కరోనా మహమ్మారి కారణంగా క్రూడాయిల్ ధరలు అంతర్జాతీయ వ్యాప్తంగా భారీగా పడిపోతున్నాయి. క్రూడ్ ఉత్పత్తి దేశాలు ఈ నెల నుండి ప్రొడక్షన్ తగ్గించుకుంటున్నాయి. అయినప్పటికీ లాక్ డౌన్ లేదా జనజీవనం ప్రపంచవ్యాప్తంగా స్తంభించిపోవడంతో చమురు ధరలు తగ్గుతున్నాయి. ఏకంగా 15 డాలర్లకు కూడా చేరుకొని, 21 సంవత్సరాల కనిష్టానికి చేరుకుంది. ఆ తర్వాత స్వల్పంగా కోలుకున్నప్పటికీ ప్రభావవంతమైన ధరలు మాత్రం లేవు. మరి చమురు ధరలు తగ్గడం భారత్‌కు మంచిదేనా?

ఆర్థిక వ్యవస్థకు సానుకూలం

ప్రస్తుత పరిస్థితుల్లో భారత్‌కు చమురు ధరల తగ్గుదల సానుకూలమే. ఆర్బీఐ డేటా ప్రకారం 2019-20 డిసెంబర్ క్వార్టర్‌లో జీడీపీలో 0.2 శాతంతో ఇండియా కరెంట్ అకౌంట్ బ్యాలెన్స్ ప్రతికూలంగా ఉంది. అంతకుముందు ఏడాది ఇదే క్వార్టర్‌లో కరెంట్ అకౌంట్ డెఫిసిట్ 2.7 శాతంగా ఉంది. ప్రస్తుత పరిస్థితుల్లో వైద్య పరికరాల దిగుమతి పెరుగుతున్నందున CAD ఆర్థిక మంత్రిత్వ శాఖకు ఉపకరిస్తుంది.

పడిపోతున్న కరెన్సీ విలువ

మార్చి 7వ తేదీ నుండి చూస్తే డాలర్ మారకంతో భారత కరెన్సీ విలువ 3.34 శాతం వరకు పడిపోయింది. ఇది CADను ప్రభావితం చేస్తుంది. మార్చి 27, 2020 నాటికి ఆర్బీఐ వద్ద 475.6 బిలియన్ డాలర్ల ఫారెక్స్ నిల్వలు ఉన్నాయి. మార్చి 2019 నుండి 62.7 బిలియన్ డాలర్ల ఫారెక్స్ నిల్వలు పెరిగాయి. మందగమనం, కరోనా వల్ల దెబ్బతింటున్న ఆర్థిక వ్యవస్థకి చమురు ధరల తగ్గుదల ప్రయోజనం.

దేశంలో ఫారన్ పోర్ట్‌పోలియో ఇన్వెస్ట్‌మెంట్స్ (FPI)లు 300 బిలియన్ డాలర్లకు పైగా ఉన్నాయి.

ఆదాయానికి ఈసారి గండి

చమురు ధరలు తక్కువగా ఉంటే ద్రవ్యోల్భణానికి కూడా సహకరిస్తుంది. అయితే చమురు ధరల తగ్గుదల ప్రభుత్వ ఆదాయానికి కూడా గండి పడినట్లే. అయితే అంతర్జాతీయ స్థాయిలో ధరలు తగ్గినట్లుగా ఇక్కడ తగ్గడం లేదు. ప్రభుత్వానికి దాదాపు 90 శాతం ఎక్సైజ్ డ్యూటీ చమురు నుండి వస్తుంది. కస్టమ్స్ మినహాయించి 2018-19లో చమురు ఆదాయం రూ. 2,63,812 కోట్లుగా ఉంది. ఈ ఏడాది మార్చిలో పెట్రోల్, డీజిల్ పైన రూ.3 పెంచినప్పటికీ రూ.14,000 కోట్లు తక్కువగానే వచ్చే అవకాశాలు ఉన్నాయి. డిమాండ్ పడిపోవడం వల్ల నష్టపోతోంది.