జీఎస్టీ రూ.4,531కి పన్ను వాటా భారంతో తెలంగాణకు ఇబ్బంది

హైదరాబాద్: రాష్ట్రాల పన్నుల వాటా కింద రావాల్సిన నిధులను తెలంగాణకు వెంటనే విడుదల చేయాలని కేంద్ర ఆర్థికమంత్రి నిర్మలా సీతారామన్‌కు సీఎం కేసీఆర్ లేఖ రాశారు. కేంద్ర బడ్జెట్‌లో పేర్కొన్న మేరకు తెలంగాణకు కేంద్ర పన్నుల వాటా రూ.19,719 కోట్లు రావాలని, గత ఏడాదితో పోలిస్తే రూ.224 కోట్లు ఇవ్వలేదన్నారు.

ఆర్థిక మాంద్యం కారణంగా తెలంగాణలో 14 శాతం జీఎస్టీ వసూళ్లు తగ్గాయని, చట్ట ప్రకారం తక్కువ రాబడి వచ్చిన రాష్ట్రాలకు కేంద్రం నష్టపరిహారం చెల్లించాలన్నారు. అంటే తెలంగాణకు రూ.1,719 కోట్లు నష్టపరిహారంగా చెల్లించాలని కోరారు. ఈ ఆర్థిక సంవత్సరంలో మరో నాలుగు నెలలు మాత్రమే మిగిలి ఉందని గుర్తు చేసారు.

కేంద్ర ఆర్థిక సంఘం సూచనలకు అనుగుణంగా 2017-18 ఆర్థిక సంవత్సరానికి సంబంధించి జీఎస్టీలోని అంతర్భాగమైన ఐజీఎస్టీ నుంచి రూ.2812 కోట్లు కేంద్రం తగ్గించిందని, దీనిని కాగ్ కూడా 2019లో విడుదల చేసిన 9వ నివేదిక ఎత్తి చూపిందన్నారు. ఈ కారణాల వల్ల జీఎస్టీ బకాయిలు రూ.4,531 కోట్లు తెలంగాణకు రాకుండా ఆగిపోయాయని, ఇదే సమయంలో పన్నుల వాటా తగ్గడం ఇబ్బందిగా మారిందని పేర్కొన్నారు.