డిజిటల్ దిశగా క్లయింట్స్, 1.10 లక్షలకు పైగా కొత్త నియామకాలు

టీసీఎస్, ఇన్ఫోసిస్, విప్రో వంటి 5 దిగ్గజ కంపెనీలు ఈ ఏడాది లక్షకు పైగా కొత్త నియామకాలు చేపట్టనున్నాయి. చాలామంది క్లయింట్స్ డిజిటల్ మోడ్‌కు మారుతున్న నేపథ్యంలో క్యాంపస్ ద్వారా లక్షలాది మందిని తీసుకోనున్నాయి ఐటీ కంపెనీలు. భారత దిగ్గజ ఐటీ కంపెనీ టీసీఎస్ క్యాంపస్ ద్వారా 40,000 మందిని నియమించుకోనుంది. ఇన్ఫోసిస్ 25వేల మందిని తీసుకోనుంది. ఎంతమందిని తీసుకుంటామనే విషయం విప్రో తెలియజేయనప్పటికీ, గత ఏడాది కంటే ఈసారి ఎక్కువ మందిని తీసుకుంటామని తెలిపింది.

లక్షకు పైగా నియామకాలు

ఈ ఏడాది నైపుణ్యాల‌కు డిమాండ్ పెర‌గ‌డంతో అయిదు ఐటి దిగ్గ‌జాలు పెద్ద ఎత్తున టెక్కీలకు అవకాశమివ్వనున్నాయి. డిమాండ్ క్రమంగా పెరుగుతుండటంతో పాటు గ్రోత్ రేటు ఊపందుకోవ‌డంతో నైపుణ్యాల‌కు గిరాకీ పెరిగింద‌ని ఇన్ఫోసిస్ సీఓఓ ప్ర‌వీణ్ రావు ఇటీవ‌ల అన్నారు. టాప్ 5 టెక్ కంపెనీలు టీసీఎస్, విప్రో, ఇన్ఫోసిస్, హెచ్‌సీఎల్, టెక్ మహీంద్రాలు 1.10కి పైగా నియామకాలు చేపడతాయని స్టాఫింగ్ ఏజెన్సీ ఎక్స్ ఫెనో సహ వ్యవస్థాపకులు అన్నారు.

నిష్క్రమణ రేటు

తాజా నియామకాలతో పాటు ఉద్యోగుల నిష్క్రమణ రేటు అధికంగా ఉంటుందని చెబుతూ, ఈ ఏడాది భారీగా హైరింగ్ ఉంటుందని అంచనా వేశారు. కంపెనీలు ఐటీ వ్యయాలు పెంచడం, ఆర్థిక కార్యకలాపాలు పుంజుకోవడంతో భారీ నియామకాలకు ఐటీ కంపెనీలు మొగ్గు చూపుతాయని చెబుతున్నారు. మైండ్ ట్రీ వంటి కంపెనీలు కూడా నియామకాలు చేపట్టనున్నాయి.

ఆట్రిషన్ రేటు

గత ఏడాది టాప్ ఫైన్ కంపెనీలు 2.10 లక్షల మందిని నియమించుకున్నాయి. ఇందులో ఆట్రిషన్ లింక్డ్ రిప్లేస్‌మెంట్ 1.20 లక్షలకు పైగా ఉంది. టీసీఎస్‌లో గత ఆర్థిక సంవత్సరం నాలుగో త్రైమాసికంలో అతి తక్కువగా 7.2 శాతం ఆట్రిషన్ రేటు ఉంది. ఇన్ఫోసిస్, విప్రో కంపెనీల విషయానికి వస్తే ఆట్రిషన్ రేటు పెరిగింది.