గుడ్‌న్యూస్: ఆధార్‌తో వెంటనే పాన్ కార్డ్ తీసుకోవచ్చు! ట్యాక్స్ పేయర్స్‌కు ఆ బాధ తప్పుతుంది

పాన్‌‌కార్డు ఇక మరింత సులభతరం కానుంది. ఎలాంటి ఇబ్బందులు లేకుండా కేవలం ఆధార్ నెంబర్ ఆధారంగా వెంటనే పాన్‌‌కార్డును తీసుకోవచ్చునని రెవెన్యూ శాఖ కార్యదర్శి అజయ్ భూషణ్ పాండే అన్నారు. ఆధార్ వివరాలు అందించడం ద్వారా ఆన్‌లైన్ పాన్ కార్డులను తక్షణమే జారీ చేసే సదుపాయాన్ని ఈ నెలలో అందుబాటులోకి తీసుకు రానున్నట్లు చెప్పారు.

ఇలా ఈ-పాన్ కార్డు తీసుకోవచ్చు

అజయ్ భూషణ్ పాండే చెప్పిన వివరాల ప్రకారం... ఆదాయ పన్ను శాఖ వెబ్‌సైట్‌లో ఆధార్ కార్డు నెంబర్‌ను ఎంటర్‌ చేయగానే రిజిస్టర్డ్ మొబైల్‌కు వన్ టైమ్ పాస్ వర్డ్ (OTP) వస్తుంది. OTPని ఎంట్రీ చేశాక ఆధార్ వివరాల పరిశీలన జరుగుతుంది. ఆ వెంటనే ఈ-పాన్ కార్డును డౌన్‌లోడ్‌ చేసుకోవచ్చు. ఈ నెలాఖరు నాటికే నూతన సేవలను అందించాలని భావిస్తున్నట్లు తెలిపారు.

ట్యాక్స్ పేయర్స్‌కు ఇబ్బందులు తప్పుతాయి

ఈ ప్రక్రియ ద్వారా ట్యాక్స్ పేయర్స్ దరఖాస్తు ఫారాల్ని నింపి ఆదాయపు పన్ను శాఖకు సమర్పించే ఇబ్బందులు తప్పుతాయని అజయ్ భూషణ్ పాండే చెప్పారు. అలాగే అధికారులు పన్ను చెల్లింపుదారుల ఇంటికి పాన్‌కార్డులను పంపించే ప్రక్రియ సులభతరం అవుతుందన్నారు.

పాన్-ఆధార్ అనుసంధానికి మార్చి 31 చివరి తేదీ

కేంద్ర ప్రభుత్వంపాన్-ఆధార్‌ కార్డు అనుసంధానాన్ని తప్పనిసరి చేసింది. ఇప్పటి వరకు 30.75 కోట్లకు పైగా పాన్ కార్డులు- ఆధార్ కార్డుతో అనుసంధానమయ్యాయి. 2020 జనవరి 27 నాటికి ఇంకా 17.58 కోట్ల పాన్ కార్డులు ఆధార్‌తో అనుసంధానం కావాల్సి ఉంది. పాన్-ఆధార్ అనుసంధానానికి ఈ ఏడాది మార్చి 31 చివరి గడువు.