మీ శాలరీలో కోత విధిస్తున్నాం, నా జీతంలోను 25% కట్: ఉద్యోగులకు సీఈవో లేఖ

గత ఏడాది మందగమనం కారణంగా ఉద్యోగాల కోత వార్తలు విన్నాం. ఇప్పుడు కరోనా కారణంగా ఉద్యోగుల వేతనాల్లో కోతలు వినాల్సి వస్తోంది. తమ సీనియర్ ఉద్యోగులకు 5 శాతం నుండి 25 శాతం వరకు వేతనాల్లో కోత విధిస్తున్నట్లు ఇండిగో సీఈవో వెల్లడించారు. అందరికంటే అధికంగా తన వేతనంలో 25 శాతం కోత ఉంటుందని తెలిపారు. కరోనా మహమ్మారి కారణంగా ప్రయాణీకులు లేక విమానయానం ఇబ్బందుల్లో ఉందని, ఆదాయం క్షీణించిందన్నారు.

కరోనా ఎఫెక్ట్... మీ శాలరీలో కోత విధిస్తున్నాం.. ఇండిగో సీఈవో లేఖ

సంస్థ మనుగడ సాగించాలంటే తగిన జాగ్రత్తలు తీసుకోవాలని సీఈవో అన్నారు. నిర్వహణకు అవసరమైన నగదు ఉండేలా చూసుకోవాలని, అందుకే ఏ, బీ బ్యాండ్ ఉద్యోగులు మినహా మిగతా వారందరికీ 2020 ఏప్రిల్ 1వ తేదీ నుండి వేతనాల్లో కోత విధిస్తున్నట్లు ఉద్యోగులకు మెయిల్ పంపించారు. ఇందుకు గల కారణాలను అందులో పేర్కొన్నారు.

ఎవరికి ఎంత కోత అంటే

సీనియర్ వైస్ ప్రెసిడెండ్, ఆ పైస్థాయి అధికారుల వేతనాల్లో 20%, వైస్ ప్రెసిడెండ్, కాక్ పిట్ సిబ్బంది వేతనాల్లో 15%, బ్యాండ్ డీ సిబ్బందితో పాటు కేబిన్ సిబ్బంది వేతనాల్లో 10%, బ్యాండ్ సీ సిబ్బంది వేతనాల్లో 5% కోత విధిస్తున్నట్టు తెలిపారు.

ఇబ్బంది అని తెలుసు.. కానీ త్యాగాలు తప్పవు

వేతనాల్లో కోత విధిస్తే కుటుంబాలకు ఎంత ఇబ్బందికరమో తమకు తెలుసునని, కానీ ఈ ఆర్థిక సంక్షోభాన్ని అధిగమించి సంస్థ మనుగడ సాగించాలంటే ఇది తప్పదని, త్యాగాలు చేయక తప్పని పరిస్థితి అని సీఈవో లేఖలో పేర్కొన్నారు. కరోనా ప్రభావం విమానయాన రంగంపై తీవ్రంగా ఉండటం భయాందోళన కలిగిస్తోంది. ప్రపంచవ్యాప్తంగా దాదాపు అన్ని దేశాల ప్రభుత్వాలు ట్రావెల్ అడ్వైజరీలు జారీ చేయడంతో మన అంతర్జాతీయ విమాన సర్వీసులు నిలిపివేయాల్సి వచ్చింది. ప్రస్తుతం డొమెస్టిక్ బుకింగ్స్ కూడా 20% మేర తగ్గాయి. ముందు ముందు పరిస్థితి ఎలా ఉంటుందో అప్పుడే చెప్పలేమని సీఈవో పేర్కొన్నారు.

అదే బాటలో ఎయిరిండియా

అంతర్జాతీయ సర్వీసులను నిలిపివేసిన నేపథ్యంలో ఆర్థిక ఇబ్బందులను తట్టుకునేందుకు ఎయిరిండియా కూడా సిబ్బంది వేతనంలో 5 శాతం కోత విధించాలని యోచిస్తోంది. కాంట్రాక్టుపై పునర్నియమించిన వంద మంది పైలట్లను తొలగించే ఆలోచన చేస్తోంది. ఇప్పటికే ఆర్థిక ఇబ్బందుల వల్ల ఎయిరిండియా తమ కేబిన్ సిబ్బందికి ఫ్లయింగ్ అలవెన్సులను తగ్గించింది. పైలెట్లు, ఇతర సిబ్బందికి ఎంటర్టైన్మెంట్ అలవెన్స్ ఉపసంహరించింది. ప్రస్తుతం కరోనా వ్యాప్తి నేపథ్యంలో అమెరికా, కెనడా తదితర దేశాలకు ఎయిరిండియా అంతర్జాతీయ సర్వీసులన్నీ దాదాపు పూర్తిగా ఆగిపోవడంతో తమ ఉద్యోగుల వేతనాల్లో 5% కోత విధించాలని యోచిస్తోందట.

గోఎయిర్ వేతనరహిత సెలవులు

కరోనా ప్రభావాన్ని నిరోధించేందుకు గోఎయిర్ తమ నిర్వహణ ఖర్చుల్ని తగ్గించుకునేందుకు చర్యలు చేపట్టింది. ఇందులో భాగంగా తమ ఉద్యోగులకు స్వల్పకాలంపాటు వేతనరహిత సెలవు ఇవ్వనున్నట్టు తెలిపింది. మార్చి 21 నుండి ఏప్రిల్ 30వ తేదీ వరకు అధిక అంతర్జాతీయ సర్వీసులు రద్దు చేస్తున్నట్లు స్పైస్ జెట్ ప్రకటించింది.