ITR Filing: అలర్ట్.. ఐటీఆర్‍లో ఈ విషయం వెల్లడించకపోతే రూ.10 లక్షలు ఫైన్ కట్టాల్సిందే..!

Income Tax Filing: ఏడాది చవరికి వస్తున్న వేళ చాలా మంది తమ టాక్స్ ఫైలింగ్స్ ప్రకారం కొన్ని అందించాల్సిన వివరాలను ఇప్పటికీ పూరించే పనిలో ఉన్నారు. అయితే ఈ క్రమంలో ఆదాయపుపన్ను అధికారులకు ఇవ్వాల్సిన కొన్ని కీలకమైన అంశాలను ఎట్టిపరిస్థితుల్లోనూ అస్సలు మరచిపోకూడదని గుర్తుంచుకోండి.

చాలా మంది భారతీయ సంపన్నులు, వ్యాపారులకు మన దేశంతో పాటు విదేశాల్లో కూడా అనేక పెట్టుబడులు ఉంటుంటాయి. ప్రస్తుతం సదరు విదేశీ ఆస్తులను నివేదించడానికి సరైన ITR ఫారమ్‌ను దాఖలు చేయాలని ఆదాయపు పన్ను శాఖ భారతీయ పౌరులకు సూచించింది. ఈ క్రమంలో తప్పుడు ఫారం పూరించి సమర్పించినట్లయితే పొరపాటును సరిచేసి కొత్తగా రిటర్న్‌ను రివైజ్ చేయాలని సూచించింది. అలా సవరించిన ITR ఫైల్ చేయడానికి చివరి తేదీ డిసెంబర్ 31, 2024గా పన్ను శాఖ నోటిఫై చేసింది. ఐటీఆర్‌లో తమ విదేశీ ఆస్తుల ద్వారా ఆర్జించిన సంపాదన గురించి టాక్స్ పేయర్స్ ప్రకటించకపోతే రూ.10 లక్షల వరకు జరిమానా విధించబడుతుందని పన్ను చెల్లింపుదారులను డిపార్ట్‌మెంట్ తాజాగా హెచ్చరించింది.

ప్రస్తుత అసెస్‌మెంట్ సంవత్సరంలో ఇప్పటివరకు విదేశీ ఆస్తులతో పాటు వాటికి సంబంధించిన ఆదాయ వివరాలను అందించే రెండు లక్షల ఆదాయపు పన్ను రిటర్న్‌లు దాఖలు చేయబడ్డాయి. అలాగే ఎంప్లాయిస్ స్టాక్ ఆప్షన్ ప్లాన్ ద్వారా తమ యజమానుల నుంచి పొందిన షేర్లు, విదేశీ ఆస్తులు, విదేశీ మూలాధార ఆదాయ షెడ్యూల్‌ను దాఖలు చేయడం ద్వారా సంపాదించిన ఆదాయాల గురించి నివాస భారతీయులు ఆదాయపు పన్ను శాఖకు తెలియజేయాలని సీనియర్ అధికారి స్పష్టం చేశారు. 2024-25 అసెస్‌మెంట్ ఇయర్ కోసం వారి ఆదాయపు పన్ను రిటర్న్స్‌లో షెడ్యూల్ ఫారిన్ అసెట్స్, ఫారిన్ సోర్సెస్ నుంచి ఆదాయాన్ని సరిగ్గా పూరించడానికి పన్ను చెల్లింపుదారులకు ఇటీవల మార్గదర్శకాలను జారీ చేయబడ్డాయి.

విదేశీ ఆదాయాలు లేదా ఆస్తులను కలిగి ఉన్న వ్యక్తులు ITR-1 లేదా ITR-4 దాఖలు చేసిన వారు యాంటీ-క్రింద సూచించిన ప్రాసిక్యూషన్, జరిమానాలను నివారించడానికి డిసెంబర్ 31 వరకు అదే దాఖలు చేయాల్సి ఉంటుందని సెంట్రల్ బోర్డ్ ఆఫ్ డైరెక్ట్ టాక్సెస్ కమిషనర్ శశి భూషణ్ శుక్లా వెల్లడించారు. డిపార్ట్‌మెంట్ అందించిన వివరాల ప్రకారం.. షెడ్యూల్ ఫారిన్ అసెట్స్ (షెడ్యూల్ FA)ని సరిగ్గా ప్రతిబింబించడానికి పన్ను చెల్లింపుదారు అతని/ఆమె పన్ను ప్రొఫైల్ ప్రకారం ITR-2 లేదా ITR-3ని తప్పనిసరిగా ఉపయోగించాలి. భారతీయ నివాసితులందరూ తమకు విదేశాల్లో ఉన్న స్థిరాస్తి, బ్యాంక్ ఖాతాలు, షేర్లు, డిబెంచర్లు, ఇన్సూరెన్స్ పాలసీలతో పాటు ఇతర రూపాల్లో లేదా సాధనాల్లో ఉన్న పెట్టుబడులకు సంబంధించిన వివరాలను పైన పేర్కొన్న విధంగా బహిర్గతం చేయాల్సి ఉంటుంది.