Marico: కెరీర్ బ్రేక్ తీసుకున్న వారికి రెండో ఛాన్స్.. ప్రముఖ FMCG కంపెనీ సూపర్ ఆఫర్..

Marico: దేశంలోని ప్రఖ్యాత FMCG కంపెనీ మ్యారికో మంచి అవకాశాన్ని కల్పిస్తోంది. ఉద్యోగాలను పోగొట్టుకున్న, వృత్తిపరమైన విరామం తీసుకున్న నిపుణులకు రెండవ అవకాశం ఇస్తూ తమ సంస్థలోకి స్వాగతం పలుకుతోంది మ్యారికో లిమిటెడ్ సంస్థ. ఇందుకోసం రెండవ కెరీర్ ప్రోగ్రామ్ ఫీనిక్స్‌ను ప్రారంభించింది.

ఫీనిక్స్ ప్రోగ్రామ్..

ఫీనిక్స్ అనేది కెరీర్ ట్రాన్సిషన్ ప్రోగ్రామ్. ఇది కనీసం ఏడాది కెరీర్ విరామం తీసుకుని కార్పొరేట్ ప్రపంచానికి తిరిగి రావడానికి ఆసక్తి చూపుతున్న నిపుణులకు అవకాశాలను అందిస్తున్నట్లు మ్యారికో వెల్లడించింది. సదరు నిపుణులు ఆరోగ్య కారణాలు, ఆకాంక్షలు లేదా వ్యక్తిత్వ ప్రాధాన్యతలను నెరవేర్చుకునేందుకు విరామం తీసుకున్న నిపుణులకు కంపెనీ ఈ అవకాశాన్ని కల్పిస్తోంది.

అర్హతలు ఏమిటి..

మ్యారికో ప్రవేశపెట్టిన ఈ ప్రోగ్రామ్‌కు అర్హత సాధించేందుకు సదరు అభ్యర్థులు గతంలో కనీసం రెండేళ్ల పాటు ఉద్యోగం చేసిన అనుభవం కలిగి ఉండాలని వెల్లడించింది. ఈ కార్యక్రమం కింద కంపెనీ తన ప్రాజెక్టుల్లోని అవసరాలకు అనుగుణంగా నియామకాలు జరుగుతాయని కంపెనీ వెల్లడించింది. ఎంపిక చేయబడే అభ్యర్థులు కంపెనీకి 6,9 లేదా 12 నెలల పాటు కన్సల్టెంట్‌లుగా పనిచేయాల్సి ఉంటుంది. అయితే వారిని పర్మనెంట్ ఉద్యోగిగా కంపెనీలో తీసుకోవటానికి అప్పటి వరకు వారి పనితీరు, కంపెనీలో ఉద్యోగాల లభ్యతపై ఆధారపడి ఉంటుందని కంపెనీ స్పష్టం చేసింది.

కొత్త యుగంలో..

మారుతున్న ఆధునిక యుగంలో ఉద్యోగులు తమ కెరీర్ ను చాలా భిన్నంగా ఉండాలని కోరుకోవటాన్ని కంపెనీ గుర్తించిందని మారికో లిమిటెడ్ CHRO అమిత్ ప్రకాష్ తెలిపారు. కొంత మందికి తమ జీవితంలోని వివిధ దశల్లో అవసరాల కారణంగా కెరీర్ విరామాలు తలెత్తవచ్చని ఆయన అన్నారు. కెరీర్ బ్రేక్‌కు సంబంధించిన కారణాలను పక్కనపెట్టి లింగ వివక్ష లేకుండా ఈ ప్రోగ్రామ్ తీసుకొచ్చినట్లు పేర్కొన్నారు.