భారత వృద్ధి రేటు మైనస్ 9 శాతం, ఎస్ అండ్ పీ అంచనా

భారత వృద్ధిరేటు 2020-21 ఆర్థిక సంవత్సరంలో మైనస్ 9శాతానికి క్షీణిస్తుందని ఎస్ అండ్ పీ గ్లోబల్ రేటింగ్స్ తాజాగా అంచనా వేసింది. ఎస్ అండ్ పీ అంతకుముందు మైనస్ 5 శాతంగా అంచనా వేసింది. ఇప్పుడు దీనిని సవరించింది. ఈ ఆర్థిక సంవత్సరం మొదటి క్వార్టర్‌లో భారత వృద్ధిరేటు మైనస్ 23.9 శాతం నమోదు చేసింది. ఈ నేపథ్యంలో ఇతర రేటింగ్ ఏజెన్సీలు వృద్ధి రేటును సవరిస్తున్నాయి. కరోనా కేసుల సంఖ్య పెరుగుతుండటంతో వృద్ధి మరింతగా క్షీణించి మైనస్ 9 శాతంగా నమోదు కావొచ్చునని తెలిపింది.

అయితే 2021-22 ఆర్థిక సంవత్సరానికి పది శాతం వృద్ధి రేటును అంచనా వేసింది. కరోనా పరిణామాలతో ప్రయివేటు రంగ పెట్టుబడులు మున్ముందు తక్కువగానే ఉండవచ్చునని ఎస్ అండ్ పీ ఆసియా పసిఫిక్ ఆర్థికవేత్త విశ్రుత్ రాణా అన్నారు. అసంఘటిత రంగాలు ఇప్పటికీ పుంజుకోలేదని, చిన్న కంపెనీల నష్టాలు కొనసాగుతున్నాయని ఎస్ అండ్ పీ తెలిపింది.

కరోనా, లాక్ డౌన్ నేపథ్యంలో ఆర్థిక కార్యకలాపాలు దెబ్బతిన్న విషయం తెలిసిందే. జూన్ నుండి క్రమంగా ఆర్థిక కార్యకలాపాలు తెరుచుకుంటున్నాయి. కరోనా కేసులు అక్టోబర్ నాటికి మరింతగా పెరిగే అవకాశాలు ఉన్నాయనే అంశం ఆందోళన కలిగిస్తున్నాయి. ఆగస్ట్ నాటికి కరోనా కేసులు సగటున రోజుకు 70,000 ఉంటే, సెప్టెంబర్ 11 వరకు 90,000గా ఉంది.