భారీగా తగ్గిన ఇళ్ల ధరలు, అంతర్జాతీయ సూచీలో 56వ స్థానంతో చివరికి..

కరోనా కారణంగా అంతర్జాతీయంగా 56 కీలక దేశాలతో పోలిస్తే భారత్‌లో ఇళ్ల ధరలు తక్కువగా ఉన్నాయని ఇంటర్నేషనల్ రియాల్టీ కన్సల్టెన్సీ నైట్ ఫ్రాంక్ వెల్లడించింది. 2020 డిసెంబర్ త్రైమాసికంలో దేశీయంగా ఇళ్ల ధరలు సగటున 3.6 శాతం క్షీణించాయని పేర్కొంది. 2019లో ఇదే సమయంలో అంతర్జాతీయంగా 43వ స్థానంలో ఉన్న భారత్ ఇప్పుడు 56కు పడిపోయింది. ఈ మేరకు నైట్ ఫ్రాంక్ గ్లోబల్ హౌస్ ప్రైస్ ఇండెక్స్ వెల్లడించింది. ప్రపంచంలోని ముఖ్యమైన 56 దేశాలు, భూభాగాల్లోని ప్రధాన నివాసస్థలాల్లో ధరలను అధికారిక గణాంకాల ఆధారంగా పరిశీలిస్తుంది.

భారత్ 56

ఈ నివేదిక ప్రకారం కరోనా దెబ్బతో 2020 డిసెంబర్‌తో ముగిసిన త్రైమాసికంలో భారత్‌లో ఇళ్ల ధరలు 3.6 శాతం తగ్గాయి. దీంతో నైట్ ఫ్రాంక్ అంతర్జాతీయ ఇళ్ల ధరల సూచీలో భారత్ కనిష్ఠ (56వ) స్థానానికి చేరుకుంది. ప్రపంచంలో అత్యంత పేలవ పనితీరు కనబర్చిన రియల్టీ మార్కెట్‌గా భారత్ నిలిచిందని ఈ నివేదిక తెలిపింది. భారత్ 2019 అక్టోబర్-డిసెంబర్ కాలంలో 43వ స్థానంలో నిలిచింది. గత ఏడాది జనవరి-మార్చిలోను అదే స్థానంలో కొనసాగింది. ఏప్రిల్-జూన్ త్రైమాసికంలో 54వ స్థానానికి పడిపోయింది. తదుపరి క్వార్టర్‌లోను అదే స్థానంలో ఉన్నప్పటికీ, డిసెంబర్ త్రైమాసికంలో పడిపోయింది.

టాప్‌లో టర్కీ

ప్రపంచంలో 56 కీలక రియాల్టీ మార్కెట్లలో 30.3% ధరల వృద్ధితో టర్కీ అగ్రస్థానంలో ఉంది. 18.6 శాతం వృద్ధితో రెండో స్థానంలో న్యూజిలాండ్, 16 శాతం ధరల పెరుగుదలతో స్లొవేకియా మూడో స్థానంలో ఉన్నాయి. కరోనాతో అధికంగా ప్రభావితమైన అమెరికాలోను ఇళ్ల ధరలు 10.4 శాతం మేర పెరిగాయి. 2020 డిసెంబర్ క్వార్టర్‌లో 89 శాతం దేశాలు, భూభాగాల్లో ధరలు పెరిగాయని ఈ రిపోర్ట్ తెలిపింది.

ఇక్కడ ఇళ్ల ధరలు తగ్గాయి

భారత్‌లో 3.6 శాతం మేర ఇళ్ల ధరలు తగ్గాయని ఈ నివేదిక తెలిపింది. మొరాకోలో 3.3 శాతం తగ్గాయి. రష్యాలో 14 శాతం, కెనడాలో 9 శాతం, బ్రిటన్‌లో 9 శాతం, జపాన్‌లో 5 శాతం, సింగపూర్‌లో 2.5 శాతం చొప్పున ఇళ్ల ధరలు పెరిగాయి. డిసెంబర్ త్రైమాసికంలో భారత్ 56వ స్థానానికి పడిపోగా, ఇదే చివరి ర్యాంక్. హాంగ్‌కాంగ్, మలేషియాల్లో ఇళ్ల ధరలు తగ్గాయి.