Layoffs: నలభై దాటిన వారిని టార్గెట్ చేస్తున్న లేఆఫ్స్! రిటైర్మెంట్ వయసు మారిపోతుందా?

సాధారణంగా 40 ఏళ్లు అంటే కెరీర్‌లో నిలదొక్కుకుని, కుటుంబ బాధ్యతలు పెరిగే వయసు. కానీ నేటి టెక్ , కార్పొరేట్ రంగాల్లో ఈ 40 ఏళ్లే అత్యంత ప్రమాదకరమైన జోన్‌గా మారుతోంది. ఒకప్పుడు 58 లేదా 60 ఏళ్లకు రిటైర్మెంట్ ఉండేది. కానీ, ఇప్పుడు లేఆఫ్స్ (Layoffs) పుణ్యమా అని 40 ఏళ్లకే చాలామంది బలవంతంగా ఇంటికి వెళ్లాల్సి వస్తోంది. అనుభవం ఉన్నా సరే.. 'కాస్ట్ కటింగ్' పేరుతో కంపెనీలు అనుభవజ్ఞులైన మధ్యతరగతి ఉద్యోగులను పక్కన పెట్టేస్తున్నాయి.

ఖర్చు తగ్గించుకోవడమే లక్ష్యమా?

కంపెనీలు ఇప్పుడు 'రోల్ రేషనలైజేషన్' అనే పదాన్ని ఎక్కువగా వాడుతున్నాయి. దీని అర్థం సింపుల్‌ గా చెప్పాలంటే.. ఎక్కువ జీతం తీసుకునే సీనియర్లను తొలగించి, వారి స్థానంలో తక్కువ జీతానికే వచ్చే యువతను నియమించుకోవడం. 43 ఏళ్ల వయసున్న ఎందరో ప్రతిభావంతులు నేడు తమ సంస్థలకు అదనపు ఖర్చుగా కనిపిస్తున్నారు. కేవలం 15 నిమిషాల కాల్‌తో 20 ఏళ్ల కెరీర్ ముగిసిపోతోంది. ఇది కేవలం ఉద్యోగం పోవడం మాత్రమే కాదు, ఒక కుటుంబం యొక్క ఆర్థిక పునాది కదిలిపోవడం అని ఉద్యోగులు వాపోతున్నారు.

అప్పుల కొండ.. ఆరని ఆశలు

మధ్యతరగతి వ్యక్తులకు 40 ఏళ్లు అంటే హోమ్ లోన్ ఈఎంఐలు, పిల్లల స్కూల్ ఫీజులు, వృద్ధాప్యంలో ఉన్న తల్లిదండ్రుల వైద్య ఖర్చులు పీక్ స్టేజ్‌ లో ఉండే సమయం. సరిగ్గా ఇప్పుడే లేఆఫ్స్ (Layoffs) వల్ల ఆదాయం ఆగిపోతే, ఆ కుటుంబం రోడ్డున పడే పరిస్థితి వస్తుంది. మన దేశంలో నిరుద్యోగ భృతి లేదా సామాజిక భద్రతా వలయాలు అంతగా లేవు. దీనివల్ల 45 ఏళ్ల వయసులో ఉద్యోగం కోల్పోయిన వారు మళ్ళీ కొత్తగా కెరీర్ ప్రారంభించలేక, అలాగని రిటైర్ అవ్వలేక ఒక రకమైన త్రిశంకు స్వర్గంలో ఉండిపోతున్నారు.

నైపుణ్యం ఉన్నా నో ఆప్షన్స్!

ముంబైలో బ్యాంకింగ్ రంగంలో పనిచేసిన నేహా లేదా మార్కెటింగ్ నిపుణురాలు సుగంధ లాంటి వారి కథలు ఇప్పుడు ప్రతి ఇంట్లోనూ వినిపిస్తున్నాయి. వీరి వద్ద అపారమైన అనుభవం ఉంది. కానీ, మార్కెట్ మాత్రం "యువత కావాలి, తక్కువ జీతానికి పనిచేసే వారు కావాలి" అని కోరుకుంటోంది. అనుభవం కంటే తక్కువ ఖర్చుకే ప్రాధాన్యత ఇవ్వడం వల్ల నైపుణ్యం కలిగిన నిపుణులు పనిలేకుండా ఖాళీగా ఉంటున్నారు. ఇది దేశ వినియోగ సామర్థ్యాన్ని , మానసిక ఆరోగ్యాన్ని కూడా దెబ్బతీస్తోంది.

పరిష్కారం ఏంటి?

ఉద్యోగులు నిరంతరం అప్‌స్కిల్లింగ్ (Upskilling) చేసుకోవడం ఒక్కటే దీనికి పరిష్కారం కాదు. కంపెనీలు కూడా అనుభవజ్ఞులైన ఉద్యోగులను ఆస్తులుగా చూడాలి తప్ప భారంగా భావించకూడదు. ప్రభుత్వం కూడా ఇటువంటి మిడ్-కెరీర్ బ్రేక్స్ వచ్చినప్పుడు ఆదుకునేలా జాతీయ స్థాయి ఫ్రేమ్‌వర్క్ లేదా ఇన్సూరెన్స్ పథకాలను ప్రవేశపెట్టాలి. లేఆఫ్స్ అనేవి కేవలం కంపెనీల బ్యాలెన్స్ షీట్లను సరిచేయవచ్చు. కానీ, అవి సమాజంలో ఒక పెద్ద శూన్యాన్ని సృష్టిస్తున్నాయి. రిటైర్మెంట్ గౌరవప్రదంగా ఉండాలి తప్ప, బలవంతంగా విధించినది కాకూడదు.