2026లో ఉద్యోగాల జాతర.. 1.28 కోట్ల కొత్త ఉద్యోగాలు.. ఈ రంగాల్లోనే భారీగా నియామకాలు..

India Jobs Report 2026: భారత ఉద్యోగ మార్కెట్ 2025లో బలమైన ప్రదర్శనతో ముగియబోతోంది. అయితే 2026లోకి అడుగుపెడుతున్న సమయంలో నియామక వాతావరణం మరింత స్థిరమైన, వ్యూహాత్మక దిశలో సాగనుందని తాజా నివేదిక స్పష్టం చేస్తోంది. ఉద్యోగాలు, ప్రతిభ వేదిక అయిన ఫౌండిట్ విడుదల చేసిన నివేదిక ప్రకారం.. 2026లో భారత మార్కెట్ సుమారు 1.28 కోట్ల కొత్త ఉద్యోగాలు సృష్టించే అవకాశం ఉంది. ఇది వేగవంతమైన విస్తరణ కంటే కూడా నాణ్యత, నైపుణ్యాలు, ఉత్పాదకతపై ఆధారపడి ఉండే వృద్ధిని సూచిస్తోంది.

2025లో నియామకాల పెరుగుదలకు ప్రధాన కారణాలుగా యజమానులలో ఉన్న బలమైన నమ్మకం, కీలక పరిశ్రమల్లో నిరంతర నియామకాలు టైర్-2, టైర్-3 నగరాల ప్రాధాన్యం పెరగడం నిలిచాయి. గతంలో మెట్రో నగరాలకే పరిమితమైన ఉద్యోగ అవకాశాలు.. ఇప్పుడు క్రమంగా చిన్న నగరాల వైపు విస్తరించడం భారత ప్రతిభ మార్కెట్‌లో ఒక కీలక మార్పుగా నివేదిక గుర్తించింది. అయితే.. 2025 రెండో అర్ధభాగంలో నియామకాల వృద్ధి రేటు ఆరు నెలల్లో సుమారు +4 శాతానికి పరిమితం కావడం గమనార్హం. ఇది కంపెనీలు ఫలితాలపై దృష్టి పెట్టిన నియామక విధానాన్ని అవలంబిస్తున్నాయనే సంకేతంగా భావించవచ్చు.

ఫౌండిట్ మార్కెటింగ్ వైస్ ప్రెసిడెంట్ అనుపమ భీమ్‌రాజ్కా ప్రకారం.. 2025 సంవత్సరం బలమైన విస్తరణతో పాటు క్రమశిక్షణ కలిగిన నియామకాలకు ఉదాహరణగా నిలిచింది. టెక్నాలజీ, బీఎఫ్‌ఎస్‌ఐ, లాజిస్టిక్స్, రిటైల్ రంగాల్లో టైర్-2 నగరాలు ఆపరేషనల్ యాంకర్‌లుగా ఎదగడం స్పష్టంగా కనిపించిందని ఆమె తెలిపారు. ఈ వికేంద్రీకరణ వల్ల కంపెనీలకు.. ఖర్చులను నియంత్రించుకోవడమే కాకుండా, విస్తృతమైన ప్రతిభ గల వర్క్‌ఫోర్స్‌ను అందిపుచ్చుకునే అవకాశం లభించింది.

2026ను నైపుణ్యాల ఆధారిత నియామక సంవత్సరంగా ఈ నివేదిక అభివర్ణిస్తోంది. ముఖ్యంగా AI-రెడీ స్కిల్స్, వ్యూహాత్మక నాయకత్వం, మిడ్-కెరీర్ డిజిటల్ టాలెంట్‌కు డిమాండ్ గణనీయంగా పెరగనుంది. డిజిటల్ టెక్నాలజీలు, కృత్రిమ మేధస్సు, క్లౌడ్ కంప్యూటింగ్, డేటా అనలిటిక్స్, సైబర్ సెక్యూరిటీ వంటి రంగాల్లో మిడ్-టు-సీనియర్ స్థాయి నిపుణుల అవసరం బలంగా కొనసాగుతుందని నివేదిక అంచనా వేస్తోంది. ఇది ఎంటర్‌ప్రైజ్‌లలో జరుగుతున్న నిరంతర డిజిటల్ మార్పుల ప్రభావం అని చెప్పవచ్చు.

రంగాల పరంగా చూస్తే.. టెక్నాలజీ, బీఎఫ్‌ఎస్‌ఐ, తయారీ, మౌలిక సదుపాయాలు, పునరుత్పాదక ఇంధనం 2026లో నియామకాలకు ప్రధాన కేంద్రపు శక్తులుగా నిలవనున్నాయి. అదే సమయంలో ఫిన్‌టెక్, హెల్త్‌టెక్, ఎలక్ట్రిక్ మొబిలిటీ వంటి అభివృద్ధి చెందుతున్న రంగాలు కొత్త అవకాశాలను తెరుస్తున్నాయి. భవిష్యత్ వృద్ధి కోసం కంపెనీలు ఇప్పుడు కేవలం సంఖ్యలకే కాకుండా సరైన నైపుణ్యాలున్న ప్రతిభపై పెట్టుబడి పెట్టడం ప్రారంభించాయి.

ఇక నగరాల వారీగా చూస్తే.. బెంగళూరు, హైదరాబాద్ టెక్నాలజీ, గ్లోబల్ క్యాప్టివ్ సెంటర్లు, AI, క్లౌడ్, సెమీకండక్టర్ కార్యకలాపాల ద్వారా నియామకాలకు ప్రధాన నాయకత్వం వహిస్తాయని నివేదిక పేర్కొంది. ముంబై, చెన్నై, పూణే వంటి మెట్రో నగరాలతో పాటు కొచ్చి, కోయంబత్తూర్, జైపూర్, బరోడా వంటి టైర్-2 నగరాలు కూడా స్థిరమైన వృద్ధిని నమోదు చేయనున్నాయి. క్లుప్తంగా చెప్పాలంటే వచ్చే ఏడాది ఉద్యోగాల జాతరేనని చెప్పవచ్చు.