గత బూమ్ ముగిసింది.. ఇకపై ఉద్యోగం సాధించడం అంత ఈజీ కాదు.. కారణం ఏంటంటే..

Indian job market 2026: భారతదేశంలో ఉద్యోగ మార్కెట్ క్రమంగా నెమ్మదిస్తోందా.. కాదు ఇది చాలా కఠినంగా మారుతోంది ప్రస్తుతం చాలా మంది భారతీయ నిపుణులు గూగుల్‌లో ప్రస్తుతం వెతుకుతున్న ప్రశ్న ఒక్కటే...ఉద్యోగాల పరిస్థితి ఏంటి.. నేను కరెక్ట్ గా ఉన్నానా లేదా.. ఇటీవల భారతదేశంలో పనిచేస్తున్న చాలా మంది ప్రొఫెషనల్స్‌ మనసులో ఈ ప్రశ్న తిరుగుతోంది. నియామకాలు నిజంగా తగ్గిపోయాయా? లేక నేను తప్పు స్కిల్స్‌తో తప్పు చోట ఉన్నానా?.. ఈ సందేహానికి సమాధానం అంత సులభం కాదు.

మైఖేల్ పేజ్ ఇండియా మేనేజింగ్ డైరెక్టర్ అంకిత్ అగర్వాలా చెప్పినట్లుగా.. భారతదేశ ఉద్యోగ మార్కెట్ పూర్తిగా ఆగిపోలేదు. కానీ ఇది ఇప్పుడు చాలా అంశాల ఎంపికతో, కఠినంగా, అసమానంగా మారింది. సరైన నైపుణ్యాలు లేని వారికి ఈ మార్కెట్ ఇకపై మినహాయింపులు ఇవ్వడం లేదు. 2021-22లో కనిపించిన భారీ నియామకాల బూమ్ ఇప్పుడు ముగిసింది. అప్పట్లో కంపెనీలు వేగంగా నియామకాలు జరిపాయి. ఇప్పుడు పరిస్థితి భిన్నంగా మారింది. నియామకాలు జరుగుతున్నాయి కానీ చాలా జాగ్రత్తగా, లోతైన స్కిల్ అంచనాలతో జరుగుతున్నాయి. అందుకే దీనిని ఉద్యోగాల కొరతగా కాకుండా నియామక వడపోతగా చూడాలని నిపుణులు చెబుతున్నారు.

అయితే అన్ని రంగాలు ఒకేలా ప్రభావితమవ్వడం లేదు. తయారీ, ఆటోమోటివ్, పునరుత్పాదక శక్తి, సరఫరా గొలుసు వంటి రంగాలు ఇప్పటికీ బలంగా ఉన్నాయి. దేశీయ తయారీకి ప్రభుత్వ ప్రోత్సాహం, ఎలక్ట్రిక్ వాహనాల వైపు మార్పు, స్వచ్ఛమైన ఇంధన లక్ష్యాలు ఈ రంగాలకు స్థిరమైన డిమాండ్‌ను అందిస్తున్నాయి. ఇవి తాత్కాలిక ఆర్థిక ఒడిదుడుకులకు అంతగా కదలవు. జాబ్ మార్కెట్ డిమాండ్ ఈ రంగాల్లో ఎప్పుడూ ఉంటుంది.

భారతదేశ ఉద్యోగ మార్కెట్‌ను ముందుకు నడిపిస్తున్న మరో కీలక శక్తి గ్లోబల్ కెపాబిలిటీ సెంటర్స్ (GCCలు). ఇవి ఇక బెంగళూరుకే పరిమితం కాకుండా హైదరాబాద్, పూణే, NCR వంటి నగరాల్లో వేగంగా విస్తరిస్తున్నాయి. AI, ప్రొడక్ట్ ఇంజనీరింగ్, ఫైనాన్స్, అనలిటిక్స్ వంటి అధిక విలువ గల ఉద్యోగాలను ఇవి సృష్టిస్తున్నాయి. ప్రస్తుతం భారత్‌లో 1,600కుపైగా GCCలు ఉండగా, దాదాపు 16 లక్షల మంది నిపుణులు వీటిలో పనిచేస్తున్నారు. వచ్చే ఐదేళ్లలో ఈ సంఖ్య మరింత పెరుగుతుందని నిపుణులు అంచనా.

జీతాల విషయానికి వస్తే.. గత రెండేళ్లుగా కనిపించిన భారీ పెరుగుదలలు ఇప్పుడు చల్లబడుతున్నాయి. సగటు ఇంక్రిమెంట్లు సాధారణ స్థాయికి చేరుతున్నాయి. అయితే ఇది అందరికీ ఒకేలా వర్తించదు. ఆటోమేషన్, డేటా అనలిటిక్స్, సైబర్ సెక్యూరిటీ, ESG వంటి కీలక నైపుణ్యాలు ఉన్నవారికి ఇప్పటికీ మెరుగైన వేతనం లభిస్తోంది. కంపెనీలు ఇప్పుడు అనుభవం కన్నా నైపుణ్యాలకే విలువ ఇస్తున్నాయి.

AI ఉద్యోగాలను పూర్తిగా నాశనం చేస్తుందనే భయం ఉన్నా.. వాస్తవం అంత తీవ్రంగా లేదు. రొటీన్‌గా, పునరావృతంగా జరిగే పనులే ఎక్కువ ప్రమాదంలో ఉన్నాయి. అయితే AIతో పాటు డొమైన్ నాలెడ్జ్ కలిగిన హైబ్రిడ్ ప్రొఫైల్స్‌కు భవిష్యత్తులో భారీ డిమాండ్ ఉండనుంది.భారతదేశం ఇక కేవలం బ్యాక్ ఆఫీస్ దేశం కాదు. ఇది వ్యూహాత్మక నిర్ణయాలు తీసుకునే, ఆవిష్కరణలకు కేంద్రంగా మారుతోంది. ఉద్యోగ మార్కెట్ కుంచించుకోవడం లేదు..కాని మరింత తెలివిగా, కఠినంగా మారుతోంది. నిరంతరం నైపుణ్యాలను అప్‌డేట్ చేసుకుంటే తప్ప భవిష్యత్తులో జాబ్ మార్కెట్లో నిలబడలేరని నిపుణులు చెబుతున్నారు.