జమ్మూ కాశ్మీర్, లడఖ్‌ల భూభాగాలను చైనా ఆక్రమించుకుంది.. డ్రాగన్ కంట్రీ మీద విరుచుకుపడిన భారత్..

చైనా సార్వభౌమాధికారాన్ని ఉల్లంఘించకూడదనే విధానానికి భారతదేశం ఎల్లప్పుడూ కట్టుబడి ఉందని.. అయితే జమ్మూ కాశ్మీర్, లడఖ్‌లకు చెందిన భారత భూభాగాలను చైనా ఇప్పటికీ అక్రమంగా ఆక్రమించి ఉంచడాన్ని సహించేది లేదని భారత ప్రభుత్వం శనివారం అత్యంత ఘాటుగా స్పష్టం చేసింది. భారత్ తమ సార్వభౌమాధికారాన్ని ఉల్లంఘిస్తోందంటూ చైనా చేసిన ఆరోపణలను విదేశాంగ మంత్రిత్వ శాఖ (MEA) తీవ్రంగా ఖండించింది. మనీలాలో జరిగిన ఆసియాన్ (ASEAN) విదేశాంగ మంత్రుల సదస్సు సందర్భంగా భారత విదేశాంగ మంత్రి ఎస్. జైశంకర్.. చైనా విదేశాంగ మంత్రి వాంగ్ యీలతో జరిపిన కీలక భేటీ అనంతరం ఈ పరిణామం చోటుచేసుకుంది.

ఈ భేటీకి సంబంధించి విదేశాంగ మంత్రిత్వ శాఖ ప్రతినిధి రణధీర్ జైస్వాల్ మాట్లాడుతూ.. భారతదేశం ఎల్లప్పుడూ చైనా సార్వభౌమాధికారాన్ని స్థిరంగా గౌరవిస్తూనే వస్తోంది. కానీ సరిహద్దుల్లో చైనా ప్రవర్తన, అక్కడ చేపడుతున్న కార్యకలాపాల విషయంలో మాత్రం అలా చెప్పలేమని పరోక్షంగా వ్యాఖ్యానించారు.

1963 నుండి జమ్మూ కాశ్మీర్, లడఖ్‌లలోని భారత భూభాగాలను చైనా అక్రమంగా ఆక్రమించడమే కాకుండా.. అక్కడ వివిధ ప్రాజెక్టులను కూడా నిర్వహిస్తోందని ఆయన ఎత్తిచూపారు. ఆయా ప్రాంతాలపై భారతదేశానికి ఉన్న పూర్తి సార్వభౌమాధికారాన్ని చైనా తన అధికారిక వైఖరిలో సూత్రప్రాయంగా అంగీకరించినప్పటికీ.. క్షేత్రస్థాయిలో మాత్రం తన అక్రమ ఉనికిని కొనసాగిస్తోందని.. దీనిని భారత్ మొదటి నుంచీ తీవ్రంగా వ్యతిరేకిస్తూనే ఉందని తెలిపారు.

మనీలా భేటీలో జైశంకర్, వాంగ్ యీలు ఇరు దేశాల ప్రస్తుత బంధాల స్థితిగతులను సుదీర్ఘంగా సమీక్షించారు. ద్వైపాక్షిక వాణిజ్యంలో మార్కెట్ ప్రాప్యతను పెంచడం, ప్రపంచ సరఫరా గొలుసులను (Global Supply Chains) పునర్నిర్మించి బలోపేతం చేసేందుకు గల అవకాశాలపై చర్చించారు. అయితే వాస్తవ నియంత్రణ రేఖ (LAC) వద్ద పూర్తిస్థాయి శాంతి, స్థిరత్వం పునరుద్ధరించబడితేనే ఇరు దేశాల మధ్య దౌత్య సంబంధాలు సాధారణ స్థితికి వస్తాయని జైశంకర్ చైనా విదేశాంగ మంత్రికి గట్టిగా తేల్చిచెప్పినట్లు సమాచారం.

Also Read

భారత్ కొంపలు ముంచబోతున్న చైనా.. బ్రహ్మపుత్ర నదిపై మెగా జలవిద్యుత్ డ్యామ్..భూకంపంపై శాస్త్రవేత్తలు తీవ్ర ఆందోళన

అటు చైనా విదేశాంగ మంత్రిత్వ శాఖ విడుదల చేసిన అధికారిక ప్రకటనలో మాత్రం భిన్నమైన వైఖరి వ్యక్తమైంది. ఇటీవల భారత్-చైనా సంబంధాలలో కనిపిస్తున్న సానుకూల మార్పులు, మెరుగుదలను మరింతగా బలపరుచుకోవాల్సిన అవసరం ఉందని వాంగ్ యి అభిప్రాయపడ్డారు. భవిష్యత్తులో ఇరు దేశాల మధ్య ఉన్నత స్థాయి సంప్రదింపులను పెంచడంతో పాటు వాణిజ్యం, సంస్కృతి, మీడియా, ప్రజల మధ్య ప్రత్యక్ష సంబంధాలను పెంపొందించుకోవడానికి సహకరించుకోవాలని చైనా ఆశాభావం వ్యక్తం చేసింది.