వ్యాపార వ్యవహారాల్లో 'ముడుపుల' రిస్క్.. ఈ జాబితాలో భారత్ గ్లోబల్ ర్యాంక్ ఎంతంటే...

వ్యాపార వ్యవహారాల నిర్వహణకు ప్రభుత్వ అధికారుల నుంచి ప్రైవేట్ కంపెనీలు ఎదుర్కొనే ముడుపుల బెడదపై ప్రతీ ఏటా 'ట్రేస్ బ్రైబరీ రిస్క్ మ్యాట్రిక్స్' సంస్థ ప్రపంచ దేశాలకు ర్యాంకింగ్స్ ప్రకటిస్తుంది. తాజాగా ఈ ఏడాది బ్రైబరీ రిస్క్ జాబితాను వెల్లడించింది. ఆ జాబితాలో 45 స్కోర్‌తో భారత్‌కు 77వ స్థానం దక్కింది. గతేడాదితో పోల్చితే భారత్ ఒక స్థానాన్ని మెరుగుపరుచుకుంది. ప్రపంచవ్యాప్తంగా 194 దేశాల్లో.. అక్కడి వ్యాపార వ్యవహారాల్లో ముడుపుల ప్రభావాన్ని ఈ సంస్థ అంచనా వేస్తుంది.

ఈ విషయంలో పొరుగు దేశాలైన పాకిస్తాన్,చైనా,నేపాల్,బంగ్లాదేశ్‌ల కంటే భారత్ మెరుగైన స్థితిలో ఉండటం గమనార్హం. అయితే మన పక్కనే ఉన్న భూటాన్ మాత్రం భారత్ కంటే మెరుగైన స్థితిలో ఉంది. 37 స్కోర్‌తో ఆ దేశం బ్రైబరీ రిస్క్‌ జాబితాలో 48వ స్థానంలో నిలిచింది.జాబితాలో అత్యంత అట్టడుగున.. చివరిదైన 194వ స్థానంలో సోమాలియా నిలిచింది. 2017-2019లో ఆ దేశం 187వ ర్యాంకులో ఉండగా... ఇప్పుడు మరింత దిగజారింది.

నార్త్ కొరియా,తుర్క్‌మెనిస్తాన్,సౌత్ సూడాన్,వెనిజులా,ఎరిత్రియా దేశాలు కూడా ర్యాంకింగ్స్‌లో అట్టడుగునే ఉన్నాయి. ముడుపుల రిస్క్ అతి తక్కువగా ఉన్న దేశాల్లో డెన్మార్క్,నార్వే,ఫిన్లాండ్,స్వీడన్,న్యూజిలాండ్ దేశాలు ఉన్నాయి. ప్రధానంగా నాలుగు అంశాల ఆధారంగా ట్రేస్ సంస్థ ఈ ర్యాంకింగ్స్‌ను నిర్ణయిస్తుంది. అందులో ప్రభుత్వంతో వ్యాపార వ్యవహారాల సంప్రదింపులు, లంచాన్ని నిరోధించేందుకు తీసుకునే చర్యలు, ప్రభుత్వ-పౌర సేవా పారదర్శకత, మీడియా పాత్రతో సహా పౌర సమాజ పర్యవేక్షణ ​​.వంటి అంశాలు ఉన్నాయి.

అధికారుల్లో ముడుపులు తీసుకునే సంస్కృతికి అడ్డుకట్ట వేసేందుకు చైనా తీసుకున్న చర్యలు ఫలితాలనిచ్చాయని ట్రేస్ సంస్థ వెల్లడించింది.