IT news: ప్రముఖ టెక్ కంపెనీలో IT సోదాలు.. ఉద్యోగులనూ వదలని అధికారులు

IT news: పన్ను ఎగవేతదారుల విషయంలో కేంద్రం కఠినంగా వ్యవహరిస్తోంది. ఈ వ్యవహారంలో ఏమాత్రం సమాచారం అందినా ఆదాయపు పన్ను శాఖ అధికారులు రైడ్స్ చేసేందుకు వెనకాడటం లేదు. ఈ చర్యలన్నీ వెరసి ట్యాక్స్ వసూళ్లు పెరగడంలో ప్రముఖ పాత్ర పోషిస్తున్నాయి.

టెక్ ఇండస్ట్రీకి చెందిన IT హార్డ్ వేర్ తయారీ సంస్థ లెనోవాపై ఆదాయపు పన్ను శాఖ అధికారులు రైడ్ చేశారు. దానితోపాటు కంపెనీ అనుబంధ సంస్థలు మరికొన్నింటిలో సోదాలు జరిపారు. హర్యానాలోని గురుగ్రామ్, కర్ణాటక రాజధాని బెంగళూరు కార్యాలయాల్లో ఈ దాడులు నిర్వహించారు.

పన్ను ఎగవేత అనుమానాలతోనే ఈ రైడ్స్ జరిపినట్లు ప్రముఖ మీడియా సంస్థ నివేదించింది. అయితే ఈ దాడుల సమయంలో కేవలం కంపెనీ అసెట్స్ మాత్రమే కాకుండా ఉద్యోగులకు సంబంధించిన ల్యాప్‌ టాప్‌ లను సైతం తనిఖీలు చేశారు. కంపెనీ సీనియర్ మేనేజ్‌ మెంట్‌ తో మాట్లాడేందుకు IT అధికారులు చేసిన ప్రయత్నాలు విఫలమయినట్లు సమాచారం.

అనంతరం కంపెనీ యాజమాన్యం ఈ వ్యవహారంపై స్పందించింది. బాధ్యత గల కార్పొరేట్ సంస్థగా తాము అన్ని నియమ, నిబంధనలను పక్కాగా పాటిస్తున్నట్లు లెనోవో ప్రతినిధులు స్పష్టం చేశారు. IT అధికారులకు పూర్తిగా సహకరించినట్లు చెప్పారు.