Tax News: ఆదాయపు పన్నులో అనూహ్య మార్పులు.. డిఫాల్ట్ ఆప్షన్‌తో ఏప్రిల్ 1 నుంచి కొత్త విధానం అమలు..

Income Tax Slabs: 2024-25 ఆర్థిక సంవత్సరం మెుదలైంది. దీంతో దేశంలోని పన్ను చెల్లింపుదారులకు టాక్స్ స్లాబ్ రేట్ల నిబంధనల్లో ముఖ్యమైన మార్పులు అమలులోకి వచ్చాయి. వీటిని పన్ను చెల్లింపుదారులు తప్పక గమనించి తదనుగుణంగా తమ టాక్స్ ఫైలింగ్స్ నిర్వహించాల్సి ఉంటుంది.

పన్ను ప్రణాళికను సులభతరం చేయడం, పన్ను చెల్లింపుదారులకు ఉపశమనం కలిగించే లక్ష్యంతో కేంద్ర ఆర్థిక మంత్రిత్వ శాఖ తన బడ్జెట్ నోటిఫికేషన్‌ల ద్వారా ఈ మార్పులను అమలు చేసింది. 2024 ఏప్రిల్ 1 నుంచి కొత్త పన్ను విధానం డిఫాల్ట్ ఎంపికగా అమలు చేయబడుతుందని గుర్తుంచుకోవాలి. అందువల్ల పాత పన్ను విధానానికి మారాలనుకునే వారు ముందుగా దానిని ఎంపిక చేసుకోవాల్సి ఉంటుంది. లేదంటే ఐటీఆర్ న్యూ టాక్స్ రీజిమ్ కింద స్వయంచాలకంగా లెక్కింపబడుతుంది..

గతంలో ఆర్థిక మంత్రి నిర్మలా సీతారామన్ తన బడ్జెట్ ప్రకటన సమయంలో దీనిని వెల్లడించారు. ఈ క్రమంలో కొత్త పన్ను విధానం కింద రూ.5 లక్షలుగా ఉన్న పన్ను మినహాయింపు పరిమితిని అంటే పన్ను రాయితీ మొత్తాన్ని రూ.7 లక్షలకు పెంచుతున్నట్లు ప్రకటించిన సంగతి తెలిసిందే. దీంతో పాటు పన్ను స్లాబ్‌ రేట్లను సైతం సవరించారు. మారిన స్లాబ్‌ రేట్లను పరిశీలిస్తే..

- రూ.3,00,000 వరకు: 0% పన్ను
- రూ.3,00,001 నుంచి రూ.6,00,000: 5% పన్ను
- రూ.6,00,001 నుంచి రూ.9,00,000 వరకు: 10% పన్ను
- రూ.9,00,001 నుంచి రూ.12,00,000 వరకు: 15% పన్ను
- రూ.12,00,001 నుంచి రూ.15,00,000: 20% పన్ను
- రూ.15,00,000 పైన: 30% పన్ను నిర్ణయించబడింది

కొత్త పన్ను విధానం సరళతను అందించే క్రమంలో తీసుకొచ్చినప్పటికీ.. పాత పన్ను విధానం ఇప్పటికీ కొనసాగించబడుతోంది. అయితే చాలా మంది మోదీ సర్కార్ రానున్న కొన్నేళ్లలో గ్యాస్ సబ్సిడీని తొలగించినట్లే పన్ను మినహాయింపులు ఉన్న పాత టాక్స్ విధానాన్ని పూర్తిగా తీసేస్తుందనే ఆందోళన వ్యక్తం చేస్తున్నారు. మరికొందరు మాత్రం.. కొత్త పన్ను విధానంలో మినహాయింపు పరిమితిని పెంచినందున కొత్త పన్ను విధానం చాలా మంది పన్ను చెల్లింపుదారులకు అనుకూలంగా ఉంటుందని భావిస్తున్నారు.

పాత ఆదాయపు పన్ను చెల్లింపుదారులు వివిధ పన్ను మినహాయింపులు, పన్ను ప్రయోజనాలను పొందేందుకు సంబంధిత పత్రాలను సురక్షితంగా ఉంచుకోవాలి. అయితే కొత్త ఆదాయపు పన్ను విధానంలో ఇలాంటి అవసరం లేదు. దీని కారణంగా పన్ను ప్రణాళిక, పన్ను దాఖలు ప్రక్రియ సులభం అవుతుందని నేటితరం యువత భావిస్తున్నారు. అలాగే.. రూ.5 కోట్ల కంటే ఎక్కువ సంపాదిస్తున్న వ్యక్తులకు సర్‌ఛార్జ్ రేటు 37% నుంచి 25%కి తగ్గించబడింది. ఈ తక్కువ సర్‌ఛార్జ్ పన్ను రేటు కొత్త పన్ను విధానాన్ని ఎంచుకున్న వారికి మాత్రమే వర్తిస్తుంది.