భారత వృద్ధి అంచనాలను తగ్గించిన ఐఎంఎఫ్, కానీ ప్రపంచంలోనే వేగవంత వృద్ధి

కరోనా తర్వాత రష్యా - ఉక్రెయిన్ యుద్ధ పరిస్థితుల కారణంగా ప్రపంచ సరఫరా గొలుసు తెగి, దాదాపు అన్ని దేశాలు ప్రభావితం అయ్యాయి. ఈ నేపథ్యంలో అంతర్జాతీయ ద్రవ్య నిధి (IMF) భారత జీడీపీ వృద్ధి రేటు అంచనాలను తగ్గించింది. ప్రస్తుతం 2022 సంవత్సరంలో 8.2 శాతం వృద్ధి నమోదవుతుందని అంచనా వేసింది. గతంలో 9 శాతం అంచనాలను ప్రకటించింది. ఇప్పుడు 80 బేసిస్ పాయింట్లు తగ్గించింది.

భారత వృద్ధి 2022 క్యాలెండర్ ఏడాదిలో మందగించినప్పటికీ ప్రపంచంలో వేగంగా వృద్ధి సాధిస్తున్న ఆర్థిక వ్యవస్థగా నిలుస్తుందని పేర్కొంది. చైనా వృద్ధి అంచనాలను 4.4 శాతానికి భారత్ వృద్ధి అంచనాలు దాదాపు రెట్టింపు. 2021లో ప్రపంచ ఆర్థిక వృద్ధి 6.1 శాతం కాగా, 2022లో ఇది 3.6 శాతానికి పరిమితం అవుతుందని అంచనా వేస్తోంది. ఐఎంఎఫ్ వరల్డ్ ఎకనమిక్ రిపోర్ట్‌లో వృద్ధి అంచనాలను పేర్కొంది.

చమురు ధరలు అంతర్జాతీయంగా భారీగా పెరిగాయని, ఈ ప్రభావం భారత వృద్ధిపై ప్రభావం చూపుతోందని, ఇది ప్రయివేటు వినియోగం, పెట్టుబడులపై ప్రభావం చూపుతాయని అంచనా వేసింది. 2022-23 ఆర్థిక సంవత్సరంలో కరెంట్ అకౌంట్ డెఫిసిట్ 3.1 శాతంగా ఉండవచ్చునని, 2021-22తో పోలిస్తే ఇది 1.5 శాతంగా ఉంటుందని పేర్కొంది. 2023-24 జీడీపీ వృద్ధి రేటు అంచనాలను కూడా 7.1 శాతం నుండి 6.9 శాతానికి తగ్గించింది. కరోనా నుండి కోలుకుంటున్న వివిధ దేశాలపై రష్యా-ఉక్రెయిన్ యుద్ధ ప్రభావం చూపిందని ఐఎంఎఫ్ గీతా గోపినాథ్ అన్నారు.