ICICI Q4 results: రూ.7 వేల కోట్ల నికర లాభం: షేర్ హోల్డర్లకు గుడ్‌న్యూస్

ముంబై: ప్రైవేట్ సెక్టార్‌లో అతి పెద్ద బ్యాంక్‌గా ఉంటోన్న ఇండస్ట్రియల్ క్రెడిట్ అండ్ ఇన్వెస్ట్‌మెంట్ కార్పొరేషన్ ఆఫ్ ఇండియా (ఐసీఐసీఐ).. తన నాలుగో త్రైమాసికానికి సంబంధించిన ఆర్థిక ఫలితాలను కొద్దిసేపటి కిందటే ప్రకటించింది. అంచనాలకు మించి రాణించింది. బ్యాంక్ నికర లాభాలు భారీగా పెరిగాయి. ఈ ఏడాది మార్చి 31వ తేదీ నాటికి ముగిసిన గత ఆర్థిక సంవత్సరంలో 59.4 శాతం మేర నెట్ ప్రాఫిట్‌ను నమోదు చేసింది.

దీని విలువ 7,018.7 కోట్ల రూపాయలు. నిజానికి ఐసీఐసీఐ నాలుగో త్రైమాసికం ప్రివ్యూ అంచనాలు 6,450 కోట్ల రూపాయలుగా నమోదయ్యాయి. దీనికి మించి రాణించిందీ బ్యాంక్. 7,018.7 కోట్ల రూపాయల నెట్ ప్రాఫిట్‌ను ఆర్జించింది. అంతకుముందు సంవత్సరంలోఐసీఐసీఐ బ్యాంక్ నికర లాభాలు 4,403 కోట్ల రూపాయలు. ఇక నికర వడ్డీ ఆదాయం కూడా 21 శాతం మేర పెరిగింది. 12,605 కోట్ల రూపాయలుగా నమోదైంది. ఇదివరకు ఈ మొత్తం 4,737 కోట్ల రూపాయలు.

నిరర్థక ఆస్తుల విలువ స్వల్పంగా క్షీణించింది. 53 బేసిస్ పాయింట్లు అంటే 3.6 శాతం మేర తగ్గింది. నికర నిరర్థక ఆస్తుల విలువ సైతం తగ్గింది. 0.76 శాతంతో తొమ్మిది బేసిస్ పాయింట్ల మేర క్షీణత కనిపించింది. నాలుగో త్రైమాసికంలో గ్రాస్ ఎన్పీఏ 4,204 కోట్ల రూపాయలుగా రికార్డయింది. అక్టోబర్-నవంబర్-డిసెంబర్ మధ్యకాలంలో ఈ మొత్తం 4,018 కోట్ల రూపాయలు. బ్యాంక్ అడ్వాన్సులు భారీగా పెరిగాయి. 17 శాతం మేర వృద్ధి నమోదు చేశాయి.

గ్రామీణ ప్రాంతాలకు ఇచ్చిన రుణాలను మినహాయించి- రిటైల్ లోన్ పోర్ట్‌ఫోలియోలో 20 శాతం పెరుగుదల కనిపించింది. ఐసీఐసీఐ బ్యాంక్ డిపాజిట్లు 14 శాతం మేర పెరిగాయి. దీని విలువ 10.64 లక్షల కోట్ల రూపాయలు. మొత్తం టర్మ్ డిపాజిట్లల్లో తొమ్మిది శాతం మేర పెరుగుదల నమోదైంది. దీని విలువ 5.46 లక్షల కోట్ల రూపాయలు. మొత్తంగా ఐసీఐసీఐ బ్యాంక్ గత ఆర్థిక సంవత్సరంలో మంచి పురోగతిని రికార్డు చేసింది. దీనితో తన షేర్ హోల్డర్లకు శుభవార్త వినిపించింది. ఒక్కో షేర్‌పై అయిదు రూపాయల డివిడెండ్‌ను ప్రకటించింది. దీనికి సంబంధించిన ప్రతిపాదనలపై ఐసీఐసీఐ బ్యాంక్ బోర్డ్ ఆఫ్ డైరెక్టర్లు ఆమోదం తెలిపారు.