IT News: టాప్ ఐటీ కంపెనీల్లో పెరిగిపోతున్న ఖాళీలు.. TCS, Wipro, Infosys షాపింగ్ రిపోర్ట్..

Tech Jobs: దేశీయ ఐటీ కంపెనీల్లోని పరిస్థితులు టెక్కీలకు టెర్రర్ పుట్టిస్తున్నాయి. ప్రధానంగా టాప్-3 ఐటీ కంపెనీలైన టీసీఎస్, విప్రో, ఇన్ఫోసిస్ లలో పరిస్థితులు ఆందోళనకు గురిచేస్తున్నాయి. 2024 ఆర్థిక సంవత్సరంలో టెక్ ఉద్యోగుల సంఖ్యలు భారీగా క్షీణించినట్లు ఇటీవలి త్రైమాసిక ఫలితాల్లో వెల్లడైంది.

అంతర్జాతీయంగా క్షీణించిన పరిస్థితులతో ఐటీ సేవల కంపెనీల వ్యాపారం తగ్గింది. చాలా కంపెనీలు తమ టెక్ బడ్జెట్‌లను కుదించటంతో భారతీయ ఐటీ కంపెనీలు తగ్గిన ఆర్డర్లతో ఇబ్బంది పడుతున్నాయి. ఇదే క్రమంలో ఈ మూడు టెక్ కంపెనీల్లో ఉద్యోగుల సంఖ్య 64,000 మేర తగ్గినట్లు వెల్లడైంది. కంపెనీల వారీగా పరిశీలిస్తే విప్రోలో ఉద్యోగుల సంఖ్య గతం ఏడాది మార్చిలో 2,58,570 నుంచి 2,34,054కి అంటే 24,516 మంది తగ్గారు. అయితే ఇది వ్యాపారం తగ్గుదలతో పాటు పెరిగిన ఆపరేటింగ్ సామర్థ్యాలు కారణంగా కంపెనీ పేర్కొంది. అలాగే ఏఐ వినియోగం పెరిగినందున ఉద్యోగుల సంఖ్య తగ్గిందని విప్రోలో చీఫ్ హ్యూమన్ రిసోర్సెస్ ఆఫీసర్ సౌరభ్ గోవిల్ వెల్లడించారు.

254 బిలియన్ డాలర్ల విలువైన భారతదేశంలోని ఐటీ సేవల రంగం ప్రపంచ స్థూల ఆర్థిక అనిశ్చితులు, భౌగోళిక రాజకీయ ఉద్రిక్తతల కారణంగా కఠినమైన సమయాల్లో నావిగేట్ చేస్తోంది. ఈ క్రమంలో దేశంలో 2న అతిపెద్ద ఐటీ సేవల కంపెనీ ఇన్ఫోసిస్ మార్చి 2024 నాటికి మునుపటి ఏడాది కంటే ఉద్యోగుల సంఖ్య 25,994 మేర తగ్గుదలను నమోదు చేసింది. అయితే కంపెనీలో అట్రిషన్ రేటు తగ్గిందని ఇన్ఫోసిస్ CFO జయేష్ సంఘ్‌రాజ్కా వెల్లడించారు. ఇలాంటి పరిస్థితుల్లో సైతం టెక్ దిగ్గజం చురుకైన క్యాంపస్ హైరింగ్ మోడల్‌ను అవలంబించింది.

ఇక చివరిగా దేశంలోని టాప్ టెక్ దిగ్గజం టీసీఎలో ఉద్యోగుల సంఖ్య మార్చి 2024 నాటికి అంతకు ముందు ఏడాదితో పోల్చితే 13,249 మేర తగ్గినట్లు వెల్లడైంది. దీంతో ప్రస్తుతం టీసీఎస్ ఉద్యోగుల సంఖ్య 6,01,546కి పరిమితమైంది. TCS, Infosys, Wiproలలో సామూహిక ఉద్యోగుల తగ్గింపు ప్రపంచ ఆర్థిక ఒత్తిళ్ల కారణంగా భారత ఐటీ పరిశ్రమ ఎదుర్కొంటున్న విస్తృత సవాళ్లను సూచిస్తోంది. ఇలాండి గడ్డు కాలంలో కంపెనీలు తమ లక్ష్యాలను చేరుకునేందుకు హ్యూహాత్మకంగా ఉద్యోగుల సంఖ్యలను సర్థుబాటు చేస్తున్నాయని నిపుణులు చెబుతున్నారు. మరికొంత కాలం ఇదే ధోరణి టెక్ ఉద్యోగాల విషయంలో కొనసాగుతాయని నిపుణులు అంచనా వేస్తున్నారు.