టీవీ సెట్స్ దిగుమతులపై కేంద్రం ఆంక్షలు.. తర్వాత ఫర్నీచర్?

మేకిన్ ఇండియాకు మరింత ప్రోత్సాహం ఇచ్చేలా నరేంద్ర మోడీ ప్రభుత్వం అడుగులు వేస్తోంది. దేశంలోనే తయారీని పెంచడం, విదేశీ దిగుమతులను తగ్గించుకునే అవకాశాలను పరిశీలిస్తోంది. అవసరంలేని వస్తువుల జాబితాలో ఉన్న టీవీల దిగుమతులపై ఆంక్షలు విధించాలని కేంద్ర ప్రభుత్వం యోచిస్తోంది. ఇందుకు కేంద్ర ఎలక్ట్రానిక్ అండ్ ఇన్ఫర్మేషన్, వాణిజ్య మంత్రిత్వ శాఖలు సంబంధిత ప్రతిపాదనపై చర్చిస్తున్నాయని తెలుస్తోంది.

పరిమితులు విధిస్తే...

టీవీ దిగుమతులపై ఆంక్షలు విధించాలని కేంద్రం భావిస్తోంది. దేశంలోకి ప్రాధాన్యం లేని ఉత్పత్తుల దిగుమతులను తగ్గించాలనే ఉద్దేశ్యంతోనే విదేశాల నుంచి వస్తున్న టెలివిజన్ సెట్లపై పరిమితుల్ని విధించాలని చూస్తోంది. ఆంక్షలతో కూడిన దిగుమతి వస్తువుల గ్రూప్‌లోకి టీవీ సెట్స్‌ను తీసుకువస్తే విదేశాల నుంచి వీటిని తీసుకు రావడానికి వాణిజ్య మంత్రిత్వ శాఖలోని విదేశీ వాణిజ్య డైరెక్టరేట్ జనరల్ నుంచి లైసెన్స్ పొందాలి.

చైనా టాప్

2018-19 మధ్య కాలంలో దాదాపు ఒక బిలియన్ అమెరికన్ డాలర్ల (రూ.7వేల కోట్లకు పైగా) వ్యాల్యూ కలిగిన టీవీ సెట్స్ లేదా ఉత్పత్తులు దేశంలోకి వచ్చాయి. భారత్‌కు వీటిని ఎగుమతి చేస్తోన్న దేశాల్లో చైనా మొదటి స్థానంలో ఉంది. ఆ తర్వాత వియత్నాం, మలేసియా, హాంకాంగ్, కొరియా, ఇండోనేషియా, థాయ్‌లాండ్, జర్మనీ ఉన్నాయి.

ఫర్నీచర్ దిగుమతులపై కూడా..

ఇండియాలోకి దిగుమతి అయ్యే విలువలో చైనా వాటా 535 మిలియన్ డాలర్లు. అంటే దాదాపు సగానికి ఎక్కువ. వియత్నాం 327 మిలియన్ డాలర్లు, మలేషియా 109 మిలియన్ డాలర్లు, హాంకాంగ్ 10.52 మిలియన్ డాలర్లు మేర దిగుమతి అవుతున్నాయి. దేశీయంగా తయారీని పెంచడంలో భాగంగా ఫర్నీచర్ దిగుమతులపై కూడా ఆంక్షలు విధించాలని కేంద్రం యోచిస్తోంది. ఇప్పటికే రిఫైన్డ్ పామాయిల్ దిగుమతులపై కేంద్రం ఆంక్షలు విధించింది.