ఇరాన్ యుద్దం ఆగకపోతే భారత్ సంక్షోభంలోకి..సంచలన రిపోర్ట్ విడుదల చేసిన గోల్డ్‌మన్ సాచ్స్

ప్రస్తుత ప్రపంచ చమురు విపణి తీవ్రమైన ఒత్తిడికి లోనవుతోంది. దీనికి ప్రధాన కారణం పశ్చిమాసియాలో ఇరాన్, అమెరికా మధ్య నెలకొన్న యుద్ధ వాతావరణమే అని చెప్పవచ్చు. ఇరాన్-అమెరికా పోరు రెండో నెలలోకి ప్రవేశించినా ఉద్రిక్తతలు తగ్గకపోవడం, అంతర్జాతీయ ఇంధన సరఫరా వ్యవస్థపై పెను ప్రభావాన్ని చూపుతోంది.

ముఖ్యంగా బ్రెంట్ క్రూడ్ ధరలు బ్యారెల్‌కు $110 దాటగా, యూఎస్ వెస్ట్ టెక్సాస్ ఇంటర్మీడియట్ క్రూడ్ $115 మార్కును అధిగమించింది. ఈ ధరల పెరుగుదల కేవలం సంఖ్యలకే పరిమితం కాకుండా, ప్రపంచవ్యాప్తంగా ఉన్న ఆర్థిక వ్యవస్థలపై, ముఖ్యంగా చమురు దిగుమతులపై ఆధారపడే ఆసియా దేశాలపై భారీ భారాన్ని మోపుతోంది.

గ్లోబల్ బ్రోకరేజ్ సంస్థ గోల్డ్‌మన్ సాచ్స్ విశ్లేషణ ప్రకారం.. హార్మూజ్ జలసంధిలో ఏర్పడే చిన్నపాటి అంతరాయం కూడా ఆసియా దేశాలను కోలుకోలేని దెబ్బ తీస్తుంది. ఎందుకంటే ఆసియాలోని ప్రధాన దేశాలు తమకు అవసరమైన శుద్ధి చేసిన చమురు ఉత్పత్తులలో సగానికి పైగా పర్షియన్ గల్ఫ్ ప్రాంతం నుండే పొందుతున్నాయి.

చైనా, జపాన్ వంటి దేశాల వద్ద కొంత కాలం తట్టుకోగలిగే వ్యూహాత్మక నిల్వలు ఉన్నప్పటికీ, దక్షిణ కొరియా, సింగపూర్, భారతదేశం వంటి దేశాలు సరఫరా గొలుసు తెగిపోతే తీవ్రమైన ఇబ్బందులు ఎదుర్కోవాల్సి ఉంటుంది. కేవలం ముడి చమురు మాత్రమే కాకుండా, నాఫ్తా, ఎల్‌పిజి వంటి పెట్రోకెమికల్ ఉత్పత్తులలో ఇప్పటికే ఒత్తిడి సంకేతాలు కనిపిస్తున్నాయి.

భారతదేశానికి సంబంధించి పరిస్థితి మరింత ఆందోళనకరంగా మారుతోంది. దేశం ఇంకా పూర్తిస్థాయి ఇంధన సంక్షోభంలోకి వెళ్ళనప్పటికీ, సరఫరా వాతావరణం చాలా 'బలహీనంగా' ఉందని విశ్లేషకులు హెచ్చరిస్తున్నారు. హార్ముజ్ జలసంధి ద్వారా వచ్చే ప్రవాహాలు నిలిచిపోతే, భారత స్థానిక చమురు ఉత్పత్తి సరఫరాలో సగటున 34 శాతం వరకు క్షీణత సంభవించవచ్చు.

ముఖ్యంగా విమానయాన రంగంపై దీని ప్రభావం అత్యధికంగా ఉంటుంది, ఎందుకంటే జెట్ ఇంధన సరఫరాపై ఏకంగా 76 శాతం ప్రభావం పడే అవకాశం ఉంది. దీనికి తోడు ఫ్యూయల్ ఆయిల్, నాఫ్తా వంటి పారిశ్రామిక ఇంధనాల కొరత వల్ల ఉత్పత్తి రంగాలు కూడా కుదేలయ్యే ప్రమాదం ఉంది.

భారతదేశం ఎదుర్కొంటున్న మరో ప్రధాన సవాలు తక్కువగా ఉన్న చమురు నిల్వలు. ప్రస్తుతం భారత్ వద్ద సుమారు 20 రోజుల ముడి చమురు నిల్వలు, 16 రోజుల శుద్ధి చేసిన ఉత్పత్తుల నిల్వలు మాత్రమే ఉన్నాయి. యుద్ధం సుదీర్ఘకాలం కొనసాగితే ఈ నిల్వలు సరిపోవు.

ఫలితంగా దిగుమతి ఖర్చులు పెరిగి దేశంలో ద్రవ్యోల్బణం ఆకాశాన్నంటుతుంది. ఇప్పటికే ఫిబ్రవరి నుండి డీజిల్, జెట్ ఫ్యూయల్ ధరలు అంతర్జాతీయంగా 150 శాతం వరకు పెరగడం, మార్కెట్ ఎంత వేగంగా బిగుసుకుపోతుందో స్పష్టం చేస్తోంది. ఇరాన్-అమెరికా ఉద్రిక్తతలు వెంటనే తగ్గకపోతే, భారతదేశం వంటి అభివృద్ధి చెందుతున్న దేశాలు తీవ్రమైన ఆర్థిక మాంద్యం, ఇంధన కొరతను ఎదుర్కోవాల్సి రావచ్చు.