Covid 19: భారత్ వృద్ధి రేటు 1.6%, ఆ సంక్షోభాలకంటే దారుణం

యూఎస్ ఇన్వెస్ట్‌మెంట్ బ్యాంక్ గోల్డ్‌మన్ సాక్స్ భారత వృద్ధి రేటును భారీగా తగ్గించింది. 2020-21 ఆర్థిక సంవత్సరంలో 3.3 శాతంగా ఉండవచ్చునని గతంలో అంచనా వేసింది. ఇప్పుడు దీనిని సగానికి పైగా తగ్గించి 1.6 శాతానికి కుదించింది. ఒక నెల రోజుల్లోనే వృద్ధి రేటు అంచనాలను కుదించడం ఇది రెండోసారి కావడం గమనార్హం. అయితే ఆ తర్వాత సంవత్సరం మాత్రం మంచి వృద్ధి రేటు కనబరుస్తుందని పేర్కొంది.

1970, 1980, 2009 ఆర్థిక సంక్షోభాలతో పోలిస్తే ప్రస్తుత ఆర్థిక సంవత్సరంలో వృద్ధి రేటు మరింత దారుణంగా ఉంటుందని తెలిపింది. ఇతర రేటింగ్ సంస్థలు కూడా భారత వృద్ధి రేటుపై ఆందోళన వ్యక్తం చేశాయి. ఫిచ్ రేటింగ్స్, ఇక్రాలిమిటెడ్ 2020-21 ఆర్థిక సంవత్సరంలో 2 శాతంగా ఉంటుందని అంచనా వేశాయి. ఎస్ అండ్ పీ 3.5 శాతం, మూడీస్ 2.5 శాతంగా అంచనా వేశాయి.

తొలుత మందగమనం, ఆ తర్వాత కరోనా మహమ్మారి కారణంగా భారత్‌లో డొమెస్టిక్ ఇన్వెస్ట్‌మెంట్, కన్సంప్షన్ పడిపోయింది. దీంతో వృద్ధి రేటును 6.1 శాతం నుండి 5 శాతానికి తగ్గించింది. నగదు సమస్య, NBFCలకు ఇబ్బందులు, మందగమనం, కరోనా.. వివిధ కారణాలతో డిమాండ్ పడిపోయింది. కరోనా వైరస్ కారణంగా 2020లో ప్రపంచ వృద్ధి రేటు 1.8 శాతానికి పడిపోతుందని, అమెరికా డీజీపీ 6.2 శాతానికి పడిపోతుందని గోల్డ్‌మన్ సాక్స్ అంచనా వేసింది.