Gold Prices Today: వారంలో భారీగా తగ్గిన బంగారం ధరలు

బంగారం ధరల క్షీణత కొనసాగుతోంది. రష్యా-ఉక్రెయిన్ యుద్ధం ఆందోళనలు తగ్గడం, ఫెడ్ రిజర్వ్ వడ్డీ రేట్లు పెంచుతుందనే వార్తల నేపథ్యంలో సురక్షిత పెట్టుబడిగా భావించే పసిడి నుండి ఇన్వెస్టర్లు డబ్బును వెనక్కి తీసుకుంటూ, ప్రత్యామ్నాయాలపై దృష్టి సారిస్తున్నారు. దీంతో పసిడి ధరలు భారీగానే తగ్గుతున్నాయి. ఇటీవల ఏడాదిన్నర గరిష్టానికి లేదా ఆల్ టైమ్ గరిష్టం రూ.56,200 సమీపానికి వెళ్లి మళ్లీ క్షీణిస్తున్నాయి. వెండి ధరలు రూ.70,000 క్రాస్ చేసినప్పటికీ, ఇప్పుడు రూ.68,000 స్థాయికి దిగి వచ్చాయి.

నిన్న ముగింపు

బంగారం ధరలు క్రితం సెషన్‌లో స్వల్పంగా తగ్గాయి. ఏప్రిల్ గోల్డ్ ఫ్యూచర్స్ నిన్న రూ.54 క్షీణించి రూ.51,510 వద్ద, జూన్ గోల్డ్ ఫ్యూచర్స్ రూ.43 తగ్గి రూ.51,981 వద్ద ముగిసింది. సిల్వర్ ఫ్యూచర్స్ అతి స్వల్ప పెరుగుదల లేదా దాదాపు స్థిరంగా ఉంది. మే సిల్వర్ ఫ్యూచర్స్ రూ.27 పెరిగి రూ.68,352 వద్ద ట్రేడ్ అయింది. అంతర్జాతీయ మార్కెట్ కామెక్స్‌లో క్రితం సెషన్‌లో గోల్డ్ ఫ్యూచర్స్ 1929 డాలర్ల వద్ద, సిల్వర్ ఫ్యూచర్స్ 25.158 డాలర్ల వద్ద ముగిసింది.

నేడు పసిడి ధరలు

ఏప్రిల్ గోల్డ్ ఫ్యూచర్స్ నేడు ప్రారంభ సెషన్‌లో రూ.243 తగ్గి రూ.51,321 వద్ద, జూన్ గోల్డ్ ఫ్యూచర్స్ రూ.199 క్షీణించి రూ.51,825 వద్ద ట్రేడ్ అయింది.

మే సిల్వర్ ఫ్యూచర్స్ ప్రారంభ సెషన్‌లో రూ.452 తగ్గి రూ.67,873 వద్ద, జూలై సిల్వర్ ఫ్యూచర్స్ రూ.378 తగ్గి రూ.68,700 వద్ద ట్రేడ్ అయింది. నేడు కనీసం రూ.69,000 మార్కును కూడా తాకలేదు.

పసిడి ధరలు కేవలం వారం రోజుల్లోనే రూ.2500 నుండి 3000 వరకు తగ్గింది. ఈ నెల రూ.55,000కు పైన ఉన్న గోల్డ్ ఫ్యూచర్స్ ఇప్పుడు రూ.51,500 దిగువకు వచ్చింది. అలాగే వెండి కిలో రూ.3000కు పైగా తగ్గింది.

150 డాలర్లు తగ్గిన గోల్డ్ ఫ్యూచర్స్

అంతర్జాతీయ మార్కెట్‌లో ఈ నెల 8వ తేదీన 2069 డాలర్లకు చేరిన ఔన్స్ గోల్డ్ ఫ్యూచర్స్ నిన్నటి సెషన్‌లో 1915 డాలర్లకు కూడా పడిపోయింది. అంటే ఈ వారం రోజుల్లోనే 150 డాలర్లకు పైగా తగ్గింది. ఈ వార్త రాసే సమయానికి గోల్డ్ ఫ్యూచర్స్ 12 డాలర్లు క్షీణించి 1917 డాలర్లకు పడిపోయింది. సిల్వర్ ఫ్యూచర్స్ 25 డాలర్ల దిగువకు వచ్చింది.