ఇన్వెస్టర్లు ఆచితూచి, పెరిగిన బంగారం ధరలు: హైదరాబాద్‌లో ఎంతంటే

బంగారం, వెండి ధరలు బుధవారం (జూన్ 10) పెరిగాయి. ఎంసీఎక్స్‌లో గోల్డ్ ఆగస్ట్ ఫ్యూచర్స్ సానుకూల ధోరణి ప్రదర్శించింది. ఉదయం గం.9.30 సమయానికి జూన్ గోల్డ్ కాంట్రాక్ట్స్ 10 గ్రాములకు 0.12 శాతం లేదా రూ.56 పెరిగి రూ.46,650 పలికింది. సిల్వర్ జూలై ఫ్యూచర్స్ 0.13 శాతం లేదా రూ.61 పెరిగి కిలో రూ.48,160 పలికింది.

ఇన్వెస్టర్లు ఆచితూచి

బంగారం ధరలు రూ.46,100 నుండి రూ.46,850 స్థాయిలో ఉండవచ్చునని, రూ.46,500కు పైకి చేరుకుంటే తిరిగి రూ.47,000 మార్క్‌కు చేరుకోవచ్చునని బులియన్ మార్కెట్ నిపుణులు అంచనా వేస్తున్నారు. ఆసియా మార్కెట్లు క్రమంగా పుంజుకుంటున్నాయి. అమెరికా డాలర్ బలహీనంగా ఉంది. ఈ ప్రభావం బంగారంపై ఉంటుంది. అమెరికా ఫెడరల్ రిజర్వ్ పాలసీ మీటింగ్ నేపథ్యంలో ఇన్వెస్టర్లు ఆచితూచి వ్యవహరిస్తున్నారు,.

అంతర్జాతీయ మార్కెట్లో..

అంతర్జాతీయ మార్కెట్లోను బంగారం ధరలు స్వల్పంగా పెరిగాయి. స్పాట్ గోల్డ్ 0.1 శాతం పెరిగి ఔన్స్ 1,715.94 డాలర్లు పలికింది. వెండి ధర ఔన్స్ 17.60 డాలర్ల వద్ద ఫ్లాట్‌గా ఉంది. ప్లాటినం ధర 0.3 శాతం తగ్గి 834.46 డాలర్లు పలికింది.

హైదరాబాద్, ఢిల్లీలలో..

బహిరంగ మార్కెట్ విషయానికి వస్తే దేశ రాజధాని ఢిల్లీలో మంగళవారం 10 గ్రాముల బంగారం ధర నిన్న రూ.46,400 కాగా, ఈ రోజు స్వల్పంగా తగ్గి రూ.46,300 పలికింది. హైదరాబాద్‌లో నిన్న 24 క్యారెట్ల బంగారం రూ.48,510 కాగా, ఈ రోజు స్వల్పంగా తగ్గి రూ.48,420 పలికింది. 22 క్యారెట్ల బంగారం రూ.44,470 పలకగా, ఈ రోజు రూ.44,350 పలికింది. అంటే బంగారం ధరలు దాదాపు స్థిరంగా ఉన్నాయి.