10 రోజుల్లో రూ.5,500 పెరిగిన బంగారం, హైదరాబాద్‌లో ఎంతంటే: ఈ వారమే ఆ రికార్డ్‌కు...!

బంగారం ధరలు పెరుగుతూనే ఉన్నాయి. ఈ రోజు (జూలై 30) ఎంసీఎక్స్‌లో ఆగస్ట్ గోల్డ్ ఫ్యూచర్స్ 10 గ్రాములకు 0.21 శాతం ఎగిసి రూ.53,300 పలికింది. అంతకుముందు సెషన్‌లో రూ.730 (1.4 శాతం) పెరిగింది. నిన్న ఓ సమయంలో రూ.53,399తో ఆల్ టైమ్ గరిష్టానికి చేరుకుంది. వెండి నిన్న కిలో 0.5 శాతం ఎగిసింది. ఈ రోజు స్వల్పంగా తగ్గుముఖం పట్టింది.

పది రోజుల్లో రూ.5,500 పెరిగిన బంగారం

కరోనా మహమ్మారి నేపథ్యంలో గత కొంతకాలంగా బంగారం ధర భారీగా పెరుగుతోంది. కొద్ది రోజుల క్రితం పెరుగుదల తగ్గుముఖం పట్టినప్పటికీ గత పది రోజులుగా మళ్లీ పుంజుకుంది. నిన్న ప్రారంభంలో స్వల్పంగా తగ్గినప్పటికీ, ఆ తర్వాత కోలుకుంది. గత పది రోజుల్లో బంగారం ధర ఏకంగా రూ.5,500 (11 శాతం) పెరిగింది.

ఢిల్లీలో రూ.53,000, హైదరాబాద్‌లో రూ.55,000 క్రాస్

బంగారం ధరలు నిన్న ప్రారంభంలో స్వల్పంగా తగ్గినప్పటికీ ఆ తర్వాత తిరిగి పుంజుకున్నాయి. ఈ రోజు పెరుగుదలతో బంగారం వరుసగా పదో రోజు కూడా పెరిగింది. బుధవారం ఢిల్లీలో 24 క్యారెట్ల బంగారం రూ.710 పెరిగి రూ.53,797కు చేరుకుంది. కిలో వెండి రూ.313 ఎగిసి రూ.65,540 పలికింది. హైదరాబాద్‌లో బుధవారం 24 క్యారెట్ల బంగారం ధర రూ.55,300 పైచిలుకు పలికింది. కిలో వెండి రూ.66,700 పలికింది.

అంతర్జాతీయ మార్కెట్లో..

గత తొమ్మిది రోజులుగా అంతర్జాతీయ మార్కెట్లోనూ ఎగిసిపడుతున్న బంగారం ధరలు తాజాగా కాస్త ఊరటనిచ్చాయి. స్పాట్ గోల్డ్ 0.3 శాతం తగ్గి ఔన్స్ 1,965.90 పలికింది. మంగళవారం 1,981 డాలర్లతో ఆల్ టైమ్ గరిష్టానికి చేరుకుంది. ఇక, గోల్డ్ ఫ్యూచర్స్ 0.2 శాతం ఎగిసి 1,981.60 వద్ద ట్రేడ్ అయింది. 2000 డాలర్లకు సమీపంలో ఉంది. వెండి 0.2 శాతం తగ్గి ఔన్స్ 24.614 డాలర్లు పలికింది.

బంగారం@2,300 డాలర్లు

గోల్డ్‌మన్ సాక్స్ బంగారం ధరలు త్వరలో ఔన్స్ 2,300 డాలర్లకు చేరుకుంటుందని అంచనా వేస్తోంది. బంగారం ఈ వారమే 2,000 డాలర్లు దాటినా ఆశ్చర్యం లేదని బులియన్ మార్కెట్ నిపుణులు అంటున్నారు. ఇతర అతి ఖరీదైన లోహాల విషయానికి వస్తే ప్లాటినమ్ 0.38% పడిపోయి 923.5 డాలర్లు పలికింది.