రెండ్రోజుల తర్వాత పెరిగిన బంగారం ధర, మరింత కాలం ఇంతేనా? తెలుగు రాష్ట్రాల్లో ఎంతంటే

గత రెండు సెషన్‌లలో తగ్గిన బంగారం ధరలు ఈ రోజు (జూన్ 16, మంగళ వారం) పెరిగాయి. పసిడికి కొనుగోళ్ల మద్ధతు లభించింది. మల్టీ కమోడిటీ ఎక్స్చేంజ్ (MCX) గోల్డ్ ఫ్యూచర్స్ 0.32 శాతం లేదా రూ.150 పెరిగి రూ.47,176కు చేరుకుంది. వెండి ఫ్యూచర్స్ కిలో 0.61 శాతం లేదా రూ.287 పెరిగి రూ.47,680కి చేరుకుంది. గత సెషన్లో బంగారం ధర 0.64 శాతం, వెండి 0.8 శాతం తగ్గింది. గత నెలలో బంగారం ధర రూ.48,000కు చేరుకొని రికార్డ్‌స్థాయికి చేరుకున్న విషయం తెలిసిందే.

అంతర్జాతీయ మార్కెట్లో ధరలు

అంతర్జాతీయ మార్కెట్లో బంగారం ధరలు ఫ్లాట్‌గా ఉన్నాయి. సెకండరీ మార్కెట్లో ఇండివిడ్యువల్ కార్పోరేట్ బాండ్స్ విక్రయిస్తామని ఫెడరల్ రిజర్వ్ ప్రకటించిన నేపథ్యంలో అమెరికా డాలర్ బలహీనపడింది. గ్లోబల్ మార్కెట్లో ఔన్స్ స్పాట్ బంగారం ధర 1725.23 పలికింది. ఇతర అతి ఖరీదైన లోహాల విషయానికి వస్తే ప్లాటినమ్ 0.7 శాతం పెరిగి 817.20 డాలర్లు, వెండి 0.4 శాతం తగ్గి 17.37 డాలర్లు పలికింది. యూఎస్ గోల్డ్ ఫ్యూచర్స్ 0.4 శాతం పెరిగి 1733 డాలర్లు పలికింది.

బంగారానికి మద్దతు

యూఎస్ డాలర్ ఇండెక్స్ ఇతర ఆరు కరెన్సీలతో పోలిస్తే 0.23% బలహీనపడింది. దీంతో ఈ కరెన్సీ కలిగిన దేశాల్లో బంగారం ధర కాస్త తగ్గింది. కరోనా మహమ్మారి నేపథ్యంలో కేంద్ర బ్యాంకులు ఆర్థిక ప్యాకేజీ వంటివి ప్రకటించిన సందర్భాల్లో కూడా బంగారానికి మద్దతు లభిస్తుంది. సమీప భవిష్యత్తులో ఆర్థిక వ్యవస్థలు అంతగా కోలుకునే పరిస్థితులు లేనందున బంగారానికి మద్దతు లభించవచ్చునని బులియన్ మార్కెట్ నిపుణులు అంచనా వేస్తున్నారు.

హైదరాబాద్‌లో రూ.50వేలకు సమీపంలో

సోమవారం దేశ రాజధాని ఢిల్లీలో బంగారం ధరలు రూ.380 తగ్గింది. సాయంత్రానికి రూ.260 తగ్గింది. హైదరాబాద్, విశాఖలలో నిన్న సాయంత్రం రూ.200కు పైగా ధర తగ్గింది. ఈ రోజు మాత్రం అతి స్వల్పంగా రూ.10 పెరిగింది. 10 గ్రాముల 24 క్యారెట్ల బంగారం ధర రూ.49,600, 22 క్యారెట్ల బంగారం రూ.45,330గా ఉంది. 24 క్యారెట్ల బంగారం రూ.50 వేలకు సమీపంలో ఉంది.

రానున్న రోజుల్లో మరింత పెరుగుదల

కరోనా మహమ్మారి, అంతర్జాతీయ పరిణామాల కారణంగా రానున్న కొద్ది రోజులు బంగారం ర్యాలీ చేయవచ్చునని నిపుణులు భావిస్తున్నారు. అంతర్జాతీయ మార్కెట్లో బంగారం ధర 1733 డాలర్ల నుండి 1745 డాలర్ల మధ్య ప్రతిఘటన ఎదుర్కోవచ్చునని చెబుతున్నారు. ఇండియాలో రూ.47330-47500 ఉంటుందని చెబుతున్నారు.