తగ్గిన బంగారం ధర, బెంగళూరులో ఎక్కువ, హైదరాబాద్‌లో తక్కువ: దిగుమతి 99.9% డౌన్

బంగారం ధరలు వరుసగా రెండో రోజు (ఏప్రిల్ 6) తగ్గాయి. ఎంసీఎక్స్‌లో గోల్డ్ ఫ్యూచర్స్ 10 గ్రాములు రూ.100 తగ్గి రూ.45,650 పలికింది. వెండి ధర 0.5 శాతం పెరిగి రూ.42,134గా ఉంది. అంతర్జాతీయ మార్కెట్లోను బంగారం ధర స్వల్పంగా తగ్గింది. అంతర్జాతీయ మార్కెట్లో స్పాట్ గోల్డ్ 0.1 శాతం తగ్గి ఔన్స్ ధర 1,704.88 వద్ద ఉంది. ప్లాటినమ్ ఔన్స్ 0.2 శాతం తగ్గి 763.05 డాలర్లు, వెండి ఔన్స్ 0.1 శాతం తగ్గి 15.01 పలికింది.

పెరుగుతున్న పెట్టుబడులు

బంగారం ధరలు అస్థిరంగా ఉన్నాయి. మరోవైపు పసిడిలో పెట్టుబడులు పెరుగుతున్నాయి. ప్రపంచ అతిపెద్ద పసిడి ఎక్స్చేంజ్ ట్రేడెడ్ ఫండ్ SPDR గోల్డ్ ట్రస్ట్ వద్ద బంగారం మంగళవారం 0.4 శాతం పెరిగి 1,076.39కి పెరిగింది. అంతకుముందు సోమవారం 1,071.71 టన్నులు ఉంది.

హైదరాబాద్, బెంగళూరులలో ఎంత తగ్గిందంటే

నేడు బెంగళూరులో బంగారం ధరలు ఎక్కువగా పడిపోయాయి. 22 క్యారెట్ల బంగారం 10 గ్రాములు రూ.850 తగ్గగా, 24 క్యారెట్ల బంగారం రూ.790 తగ్గింది. హైదరాబాద్ మార్కెట్లో 22 క్యారెట్ల బంగారం రూ.150, 24 క్యారెట్ల బంగారం రూ.50 తగ్గింది. భాగ్యనగరంలో 22 క్యారెట్ల బంగారం రూ.43,900, 24 క్యారెట్ల బంగారం రూ.46,600 పలికింది.

99.9% పడిపోయిన బంగారం దిగుమతులు

మరోవైపు, ఏప్రిల్ నెలలో బంగారం దిగుతులు ఏకంగా 99.9 శాతం పడిపోయాయి. మూడు దశాబ్దాల కనిష్టానికి తగ్గిపోయాయి. ప్రపంచంలోని అతిపెద్ద బంగారం దిగుమతిదారుల్లో భారత్ రెండో స్థానంలో ఉంటుంది. గత నెలలో దిగుమతులు కేవలం 50 కిలోలు మాత్రమే. అంతకుముందు ఇదే ఏఢాది ఇదే ఏప్రిల్ నెలలో 110.18 టన్నుల బంగారం దిగుమతి చేసుకుంది. వ్యాల్యూ పరంగా 3.97 బిలియన్ డాలర్ల నుండి ఏకంగా 2.84 మిలియన్ డాలర్లకు పడిపోయింది. కరోనా, లాక్ డౌన్ వంటి వివిధ కారణాల వల్ల ఈ ఏఢాది బంగారం దిగుమతులు 350 టన్నులకు పడిపోవచ్చునని అంచనా వేస్తున్నారు.