పెరిగిన బంగారం ధర.. కారణమిదే: రూ.50,000కు పెరిగే ఛాన్స్!

ఇటీవల తగ్గుముఖం పట్టిన బంగారం ధరలు మళ్లీ పెరుగుతున్నాయి. అంతర్జాతీయ మార్కెట్లో పసిడికి డిమాండ్ పెరిగింది. చైనాలో పుట్టిన ప్రాణాంతక కరోనా వైరస్, డాలర్‌తో రూపాయి మారకం విలువ, స్థానిక వ్యాపారుల నుండి డిమాండ్ వంటి వివిధ కారణాల వల్ల మంగళవారం ధరలు పెరిగాయి. దేశీయంగా, అంతర్జాతీయంగా పసిడి ధరలు పెరిగాయి.

బంగారం ధర ఎంత పెరిగిందంటే

ఎంసీఎక్స్‌లో ఈ రోజు (ఫిబ్రవరి 18) ఉదయం గం.9.20 సమయానికి 10 గ్రాముల పసిడి రూ.220 పెరిగి రూ.40,976కు ఎగబాకింది. అంతర్జాతీయ మార్కెట్లో స్పాట్ గోల్డ్ ఔన్స్‌కు 1,586.19 డాలర్లకు పెరిగింది. గత పదిహేను రోజుల్లో అంటే ఫిబ్రవరి 3వ తేదీ నుండి అత్యధిక ధర ఇదే. ఆ రోజున 1,586.90 డాలర్లుగా ఉంది.

మళ్లీ రూ.41 వేలు దాటొచ్చు

పసిడి ధర త్వరలో మళ్లీ రూ.41,000 దాటవచ్చునని నిపుణులు అంచనా వేస్తున్నారు. ఈ ఏడాది బంగారం ధర 10 గ్రాములు రూ.50,000కు చేరుకోవచ్చునని బులియన్ మార్కెట్ నిపుణులు అంచనా వేస్తున్నారు. వెండి ధర కూడా కిలోకు రూ.222 పెరిగి రూ.46,345కు చేరుకుంది.

బంగారం పెరగడానికి కారణాలు..

బంగారం ధరలు పెరగడానికి వివిధ కారణాలు ఉన్నాయి. డాలరుతో పోలిస్తే రూపాయి మారకం విలువ పడిపోవడంతో పాటు కరోనా వైరస్ ప్రభావం ఎక్కువగానే ఉందని అంచనాలు ఉండటంతో అంతర్జాతీయంగా ఇన్వెస్టర్లు సురక్షిత పెట్టుబడిగా భావించే బంగారం వంటి అతి ఖరీదైన లోహాల వైపు దృష్టి సారిస్తున్నారు.