ఐదు రోజుల్లో రూ.1500 పెరిగిన బంగారం ధరలు, వెండి మాత్రం డౌన్

కరోనా థర్డ్ వేవ్ సహా వివిధ అంశాలు బంగారంపై ఒత్తిడిని పెంచుతున్నాయి. వరుసగా మూడో రోజు బంగారం ధరలు భారీగా పెరిగాయి. గోల్డ్ ఫ్యూచర్స్ నిన్న రూ.48,000ను తాకింది. నేడు ఆ మార్కును తాకనప్పటికీ మరో ఒక్కరూపాయి దూరంలో మాత్రమే నిలిచింది. ఆ తర్వాత కాస్త తగ్గిన రూ.47,900 పైన కదలాడుతోంది. ఆల్ టైమ్ గరిష్టం రూ.56200తో పోలిస్తే బంగారం రూ.8300 తక్కువగా ఉంది.

ఆగస్ట్ గోల్డ్ ఫ్యూచర్స్ రూ.234.00 (0.49%) ఎగిసి రూ.47918.00 వద్ద ట్రేడ్ అయింది. అక్టోబర్ గోల్డ్ ప్యూచర్స్ రూ.174.00 (0.36%) ఎగిసి రూ.48170.00 వద్ద నిలిచింది. వెండి ధరలు మాత్రం తగ్గాయి. సిల్వర్ సెప్టెంబర్ ఫ్యూచర్స్ రూ.141.00 (-0.20%) క్షీణించి రూ.69371.00 వద్ద, డిసెంబర్ ఫ్యూచర్స్ రూ.218.00 (-0.31%) తగ్గి రూ.70671.00 వద్ద ట్రేడ్ అయింది.

అంతర్జాతీయ మార్కెట్లో గోల్డ్ ఫ్యూచర్స్ 1800 డాలర్ల పైనే కదలాడుతోంది. నేడు 10 డాలర్లకు పైగా ఎగిసి 1804 డాలర్ల వద్ద ట్రేడ్ అయింది. సిల్వర్ ఫ్యూచర్స్ మాత్రం క్షీణించింది. అతి స్వల్పంగా 0.002 శాతం తగ్గి రూ.26.172 వద్ద ట్రేడ్ అయింది. బంగారం ధరలు గత ఐదు సెషన్లలో రూ.1500 వరకు పెరిగింది.