భారీగా షాకిచ్చిన బంగారం, 46,000 రికార్డ్ దాడి పరుగులు

కరోనా మహమ్మారి కారణంగా పెట్టుబడిదారులు సురక్షిత బంగారం వంటి అతి ఖరీదైన లోహాల వైపు చూస్తున్నారు. దీంతో పసిడి ధరలు భారీగా పెరుగుతున్నాయి. అంతకుముందు కాస్త తగ్గుముఖం పట్టిన ధరలు గత ఆరు రోజులుగా పెరుగుతున్నాయి. ముంబై బులియన్ మార్కెట్‌లో ఈ రోజు 10 గ్రాముల బంగారం ధర రూ.46,034 రికార్డ్ గరిష్టానికి చేరుకుంది. కరోనా కారణంగా ప్రపంచవ్యాప్తంగా ఆర్థిక సంక్షోభం కనిపిస్తుండటంతో పసిడి వైపు చూస్తున్నారు.

ముంబై బులియన్ మార్కెట్లో ధరలు..

ముంబై బులియన్ మార్కెట్లో 10 గ్రాముల బంగారం ధరలు ఇలా ఉన్నాయి. 18 క్యారెట్ల బంగారం రూ.34,526, 22 క్యారెట్ల పసిడి రూ.42,167, 24 క్యారెట్ల బంగారం రూ.46,034 పలికింది. దీనికి జీఎస్టీ అదనం.

బంగారం, డాలర్..

కరోనా వల్ల ప్రపంచమంతా ఆర్థిక సంక్షోభంలో ఉండటంతో బంగారం వంటి అతి ఖరీదైన లోహాలతో పాటు డాలర్ వంటి వాటిపై ఇన్వెస్ట్ చేస్తున్నారని బులియన్ మార్కెట్ నిపుణులు చెబుతున్నారు. గత వారం నెల గరిష్టానికి చేరుకున్న పసిడి ధరలు ఇప్పుడు రికార్డ్ హైకి చేరుకున్నాయి.

మార్కెట్ ట్రెండ్

అంతర్జాతీయ మార్కెట్ విషయానికి బులియన్ ట్రెండ్ కామెక్స్‌లో ఔన్స్ బంగారం ధర 1,675 డాలర్ల నుండి 1,705 డాలర్లు ఉండవచ్చునని, భారత మార్కెట్లో రూ.45,900 నుండి రూ.46,600 మధ్య ఉండవచ్చునని అంచనా వేస్తున్నారు. ఈ రోజు 1690 డాలర్ల వద్ద ఫ్లాట్‌గా కనిపించింది. వెండి ధర కూడా ఈరోజు కిలో రూ.870 పెరిగి రూ.42,900 పలికింది.

ఫ్యూచర్ మార్కెట్

ఫ్యూచర్ మార్కెట్ విషయానికి వస్తే ఎంసీఎక్స్‌లో ఇంట్రాడే గరిష్టం రూ.46,385, కనిష్టం రూ.45,622 పలికింది. జూన్ సిరీస్ కనిష్టం రూ.36,572, గరిష్టం రూ.46,385 పలికింది. ఎంసీఎక్స్‌లో గోల్డ్ ఫ్యూచర్స్ జూన్ రూ.961 (2.12 శాతం) పెరిగి రూ.46,255 వద్ద క్లోజ్ అయింది. ఆగస్ట్ డెలివరీ రూ.947 (2.08 శాతం) పెరిగి రూ.46,433 వద్ద క్లోజ్ అయింది. బంగారం ధర దాదాపు రూ.1,000 వరకు పెరిగింది. ప్రస్తుత పరిస్థితుల్లో ఇన్వెస్టర్ పసిడిని సురక్షిత పెట్టుబడిగా భావిస్తున్నాడు.