2 రోజుల్లో రూ.1,000 పెరిగిన ధర, నేడు రూ.300కు పైగా తగ్గుదల, పెరుగుతున్న పెట్టుబడి

బంగారం ధరలు ఈ రోజు (ఏప్రిల్ 5) స్వల్పంగా తగ్గాయి. గత రెండు మూడు రోజులుగా బంగారం ధరలు పెరుగుతున్నాయి. రెండు సెషన్లలో రూ.1,000 పెరిగిన ధర ఈ రోజు కాస్త తగ్గుముఖం పట్టింది. ఎంసీఎక్స్‌లో జూన్ గోల్డ్ ఫ్యూచర్స్ 10 గ్రాముల ధర 0.72 శాతం లేదా రూ.329 తగ్గి రూ.45,478 పలికింది. వెండి ధర కిలో 0.26 శాతం తగ్గి రూ.41,137 పలికింది.

అంతర్జాతీయ మార్కెట్లో బంగారం ధరలు

అంతర్జాతీయ మార్కెట్లో బంగారం ధరలు ఫ్లాట్‌గా ఉన్నాయి. వివిధ దేశాలు లాక్ డౌన్ ఆంక్షలను సులభతరం చేస్తున్నారు. దీంతో బంగారంపై ఒత్తిడి తగ్గుతోంది. అదే సమయంలో అమెరికా - చైనా మధ్య మరోసారి వాణిజ్య యుద్ధ వాతావరణం కనిపిస్తోంది. దీంతో ఔన్స్ బంగారం గ్లోబల్ మార్కెట్లో 1,700 డాలర్ల వరకు పలికింది. ఇతర అతి ఖరీదైన లోహాల విషయానికి వస్తే ప్లాటినమ్ ఔన్స్ 0.1 శాతం తగ్గి 764.91, వెండి 0.2 శాతం తగ్గి 14.81 పలికింది.

పెరిగిన పెట్టుబడులు

మరోవైపు బంగారంపై పెట్టుబడులు అంతర్జాతీయంగా పెరుగుతున్నాయి. ప్రపంచ అతిపెద్ద గోల్డ్ ఎక్స్చేంజ్ ట్రేడ్ ఫండ్ SPDR గోల్డ్ ట్రస్ట్ వద్ద 0.4 శాతం పెరిగి 1,071.71 టన్నులకు పెరిగింది. శుక్రవారం ఇది 1,067.90 టన్నులుగా ఉంది. మరోవైపు లాక్ డౌన్ ఆంక్షలను వివిధ దేశాలు క్రమంగా సడలిస్తోన్న నేపథ్యంలో అమెరికా డాలర్ బంగారం లాభాలను అధిగమించవచ్చునని అంచనా వేస్తున్నారు.

సోమవారం మిశ్రమ ధోరణి

బంగారం, వెండి ధరలు సోమవారం మిశ్రమ ధోరణిని చూపాయి, దేశీయ, అంతర్జాతీయ మార్కెట్లలో వెండి ధరలు తగ్గుముఖం పట్టగా, బంగారం లాభపడింది. యూఎస్ ఫ్యాక్టరీ ఆర్డర్స్, డేటా, అంతర్జాతీయంగా ఈక్విటీలు బలహీనపడటంతో బంగారంపై ఒత్తిడి పెరిగింది. కానీ వెండి ధర మాత్రం నిన్న తగ్గింది.