మళ్లీ పెరిగిన బంగారం ధరలు, రూ.47,000 క్రాస్: వెండి రూ.69,000 సమీపంలో

ముంబై: బంగారం ధరలు నేడు (మే 3 సోమవారం) స్వల్పంగా పెరిగాయి. దేశీయ ఫ్యూచర్ మార్కెట్ మల్టీ కమోడిటీ ఎక్స్చేంజ్ (MCX)లో 10 గ్రాముల గోల్డ్ ఫ్యూచర్స్ మళ్లీ రూ.47,000 దాటింది. యూఎస్ డేటాకు ముందు డాలర్ మ్యూట్‌గా ఉంది. అలాగే, కరోనా సెకండ్ వేవ్ నేపథ్యంలో ఈక్విటీ మార్కెట్లు క్షీణించాయి. క్రిప్టోకరెన్సీ పైన ఇన్వెస్టర్ల ఆచితూచి వ్యవహరిస్తున్నారు. దీంతో సురక్షిత పెట్టుబడిగా భావించే బంగారం ధరలు పెరుగుతున్నాయి. దేశీయ, అంతర్జాతీయ మార్కెట్లో ధరలు ఎగిశాయి. వెండి ధరలు కూడా నేడు కాస్త జంప్ చేశాయి.

రూ.47,000 పైకి బంగారం

దేశీయ ఫ్యూచర్ మార్కెట్ మల్టీ కమోడిటీ ఎక్స్చేంజ్(MCX)లో 10 గ్రాముల జూన్ గోల్డ్ ఫ్యూచర్స్ నేటి మధ్యాహ్నం సెషన్లో రూ.268.00 (0.57%) పెరిగి రూ.47005.00 వద్ద ట్రేడ్ అయింది. రూ.46,921.00 వద్ద ప్రారంభమైన ధర, రూ.47,197.00 గరిష్టాన్ని, రూ.46,921.00 కనిష్టాన్ని తాకింది. ఆగస్ట్ గోల్డ్ ఫ్యూచర్స్ రూ.93.00 (0.62%) పెరిగి రూ.47344.00 వద్ద ట్రేడ్ అయింది. రూ.47,300.00 వద్ద ప్రారంభమై, రూ.47,500.00 గరిష్టాన్ని, రూ.47,250.00 కనిష్టాన్ని తాకింది.

రూ.68వేలు దాటిన వెండి

వెండి ఫ్యూచర్ ధరలు నేడు స్వల్పంగా పెరిగాయి. మే సిల్వర్ ఫ్యూచర్స్ నేడు మధ్యాహ్నం సెషన్లో రూ.587.00 (0.87%) పెరిగి రూ.68111.00 వద్ద ట్రేడ్ అయింది. రూ.67,925.00 వద్ద ప్రారంభమై, రూ.68,300.00 గరిష్టాన్ని, రూ.67,768.00 వద్ద కనిష్టాన్ని తాకింది. జూలై సిల్వర్ ఫ్యూచర్స్ రూ.696.00 (1.02%) పెరిగి రూ.69062.00 వద్ద ట్రేడ్ అయింది. రూ.68,807.00 ప్రారంభమైన ధర, రూ.69,197.00 వద్ద గరిష్టాన్ని, రూ.68,607.00 కనిష్టాన్ని తాకింది.

అక్కడ మళ్లీ పెరిగింది కానీ

అంతర్జాతీయ ఫ్యూచర్ మార్కెట్లో బంగారం ధరలు పెరిగాయి. అయితే 1775 డాలర్ల వద్దే కదలాడుతున్నాయి. అంతర్జాతీయ మార్కెట్లో గోల్డ్ ఫ్యూచర్స్ నేడు 7.75 (0.44%) డాలర్లు పెరిగి 1,775.45 డాలర్ల వద్ద కదలాడింది. నేటి సెషన్లో 1,765.70 - 1,781.35 డాలర్ల మధ్య కదలాడింది. సిల్వర్ ఫ్యూచర్స్ స్వల్పంగా పెరిగింది. +0.330 (1.28%) డాలర్లు పెరిగి 23.203 డాలర్ల వద్ద ట్రేడ్ అయింది. నేటి సెషన్లో 25.858 - 26.207 డాలర్ల మధ్య కదలాడింది.