నిన్నటి వరకు భారీగా పెరిగి, నేడు తగ్గిన బంగారం ధరలు, చమురు ధరలు కూడా డౌన్

బంగారం ధరలు భారీగా తగ్గాయి. గత మూడు సెషన్‌లలో దాదాపు రూ.3000 పెరిగిన పసిడి ధరలు నేడు రూ.400 తగ్గాయి. ఏప్రిల్ గోల్డ్ ఫ్యూచర్స్ నేటి సెషన్‌లో రూ.401 తగ్గి రూ.53,823 వద్ద, జూన్ గోల్డ్ ఫ్యూచర్స్ రూ.389 తగ్గి రూ.54,375 వద్ద ట్రేడ్ అయింది. అంతర్జాతీయ మార్కెట్‌లో అల్ టైమ్ గరిష్టానికి పది డాలర్ల దూరంలోనే నిన్న కనిపించిన గోల్డ్ ఫ్యూచర్ నేడు మాత్రం భారీగా తగ్గింది. ఈ వార్త రాసే సమయానికి 21 డాలర్లు క్షీణించి 2022 వద్ద ట్రేడ్ అయింది.

సిల్వర్ ఫ్యూచర్స్ మాత్రం స్థిరంగా లేదా అతి స్వల్పంగా తగ్గింది. మే సిల్వర్ ఫ్యూచర్స్ రూ.22 తగ్గి రూ.71,363 వద్ద, జూలై సిల్వర్ ఫ్యూచర్స్ రూ.85 పెరిగి రూ.72,163 వద్ద ట్రేడ్ అవుతోంది. అంతర్జాతీయ మార్కెట్లో సిల్వర్ ఫ్యూచర్స్ 0.300 డాలర్లు క్షీణించి 26.595 డాలర్ల వద్ద ట్రేడ్ అయింది. గోల్డ్ ఫ్యూచర్స్ నేటి సెషన్‍‌లో రూ.54,000 దిగువకు వచ్చింది. ఇక సిల్వర్ ఫ్యూచర్స్ మాత్రం రూ.71,000కు పైనే ఉంది.

రష్యా - ఉక్రెయిన్ యుద్ధం దాదాపు ముగింపు దశకు వచ్చినట్లుగా కనిపిస్తోంది. దీంతో గోల్డ్ ఇన్వెస్టర్లు అప్రమత్తంగా కదలాడుతున్నారు. అంతర్జాతీయ మార్కెట్‌‍లో బ్రెంట్ క్రూడ్ ధరలు కూడా మెల్లిగా దిగి వస్తున్నాయి. ఉదయం సెషన్‌లో 130 డాలర్లు దాటిన బ్రెంట్ ఇప్పుడు 126 డాలర్లకు, వెస్ట్ టెక్సాస్ ఇంటర్మీడియేట్ 122 డాలర్లకు తగ్గింది.