పసిడిపై 2020లో వచ్చిన రిటర్న్స్ 2021లో రాకపోవచ్చు! ఎందుకంటే..

2020 సంవత్సరంలో బంగారం ధరలు 25 శాతం మేర రిటర్న్స్ ఇచ్చాయి. మార్చి నుండి ఆగస్ట్ మొదటి వారం మధ్య అంతకంటే ఎక్కువ రిటర్న్స్ ఇచ్చినప్పటికీ, ఆ తర్వాత కాస్త తగ్గాయి. ఇటీవల అంతర్జాతీయ ఫ్యూచర్ మార్కెట్లో 1900 డాలర్ల దిగువన, దేశీయ ఫ్యూచర్ మార్కెట్లో రూ.50,000 వద్ద కదలాడుతోంది. కరోనాకు తోడు కేంద్ర బ్యాంకులు వడ్డీ రేట్లు తగ్గించడం వంటి అంశాలు బంగారం పెరుగుదలకు కారణమయ్యాయి. అయితే ఈ సంవత్సరం (2021) అంత గత ఏడాదిలా పసిడి రిటర్న్స్ అందించే అవకాశాలు తక్కువ అంటున్నారు.

అలాగే ఉండే అవకాశం

గత ఏడాది ప్రారంభంలో అంతర్జాతీయ మార్కెట్లో ఔన్స్ పసిడి 1461 వద్ద ప్రారంభం కాగా ఓ సమయంలో 2072ని తాకింది. ఏడాది చివరలో 1900 డాలర్లకు సమీపంలో క్లోజ్ అయింది. మొత్తంగా 25 శాతం నుండి 28 శాతం వరకు పసిడి రిటర్న్స్ ఇచ్చింది. ఈ వారం కూడా పసిడి ధరలు దాదాపు అదే స్థాయిలో ఉండే అవకాశాలు ఎక్కువగా ఉన్నాయని బులియన్ మార్కెట్ నిపుణులు భావిస్తున్నారు.

అంత భారీ రిటర్న్స్ లేకపోయినా.. పెట్టుబడులు

2021లో కరోనా పరిస్థితులు దారుణంగా ఉంటే తప్ప 2020లో వచ్చిన భారీ రిటర్న్స్ రాకపోవచ్చునని బులియన్ మార్కెట్ నిపుణులు అంటున్నారు. అయితే ఫెడ్ రిజర్వ్ సుదీర్ఘ కాలం వడ్డీ రేటును జీరోగా ఉంచడం, వివిధ కేంద్ర బ్యాంకులు వడ్డీ రేట్లు తగ్గించిన నేపథ్యంలో మాత్రం బంగారంపై పెట్టుబడులు పెరిగే అవకాశాలు ఉన్నాయని అంటున్నారు.

అక్కడ అంతే

గతవారం దేశీయ, అంతర్జాతీయ ఫ్యూచర్ మార్కెట్లో పసిడి, వెండి ధరలు అతి స్వల్పంగా పెరిగాయి. ఎంసీఎక్స్‌లో ఫిబ్రవరి గోల్డ్ ఫ్యూచర్స్ 0.1 శాతం పెరిగి రూ.50,235 వద్ద, మార్చి సిల్వర్ ఫ్యూచర్స్ 0.02 శాతం ఎగిసి రూ.68,120 వద్ద క్లోజ్ అయింది. కామెక్స్‌లో గోల్డ్ ఫ్యూచర్స్ 0.01 శాతం పెరిగి 1901.60 డాలర్ల వద్ద, సిల్వర్ ఫ్యూచర్స్ 0.01 శాతం తగ్గి 26.525 డాలర్ల వద్ద ముగిసింది.