రష్యా గ్యాస్ వార్: అమాంతం పెరిగిన క్రూడాయిల్ ధర: పెట్రోల్, డీజిల్‌పైనా: ఇవ్వాళ్టి కొత్త రేట్లివే

ముంబై: అంతర్జాతీయంగా మార్కెట్‌లో క్రూడాయిల్ ధరలో మళ్లీ పెరుగుదల కనిపించింది. యూరప్‌కు సరఫరా చేస్తోన్న గ్యాస్‌లో రష్యా కోత పెట్టిన ప్రభావం ఆయిల్ మార్కెట్‌పై పడింది. నిన్నటి వరకు 95 డాలర్ల దిగువన ట్రేడింగ్ అయిన క్రూడాయిల్ బ్యారెల్ రేటు.. ఇప్పుడు పెరిగింది. 100 డాలర్లను దాటేసింది. బ్రెంట్ ఫ్యూచర్స్ ట్రేడింగ్‌లో బ్యారెల్ క్రూడాయిల్ 101.16 డాలర్లు పలుకుతోంది. వెస్ట్ టెక్సాస్ ఇంటర్మీడియట్‌‌లో ఈ రేటు మరింత తగ్గింది. బ్యారెల్ క్రూడాయిల్ రేటు 97.53 వద్ద ట్రేడింగ్ నమోదైంది.

రష్యా గ్యాస్ వార్‌తో..

రష్యా కొత్తగా గ్యాస్ వార్‌ను మొదలు పెట్టింది. యూరోప్‌కు సరఫరా చేసే రోజువారీ గ్యాస్‌లో కోత పెట్టింది. నార్డ్ స్ట్రీమ్ పైప్‌లైన్ మీదుగా యూరోప్‌కు సరఫరా చేస్తోన్న రోజువారీ గ్యాస్‌ సరఫరాను 33 మిలియన్ క్యూబిక్ మీటర్లకు తగ్గించింది. దీనిపై రష్యా ప్రభుత్వ ఆధీనంలో పని చేస్తోన్న గ్యాస్ కంపెనీ గజ్‌ప్రామ్ ఓ ప్రకటన చేసింది. అంతర్జాతీయ మార్కెట్‌లో క్రూడ్ ధరలు మళ్లీ పెరుగుదల బాట పట్టడానికి ఇదే కారణమనే అభిప్రాయాలు ఉన్నాయి.

ఇవ్వాళ్టి రేట్లిలా..

చమురు కంపెనీలు కొద్దిసేపటి కిందటే జారీ చేసిన ధరల ప్రకారం.. దేశ రాజధానిలో పెట్రోల్ లీటర్ ఒక్కింటికి రూ.96.72 పైసలు, డీజిల్ రూ.89.62 పైసలు పలుకుతోంది. మహారాష్ట్ర ప్రభుత్వం రెండోసారి వ్యాట్‌ను తగ్గించిన తరువాత ముంబైలో పెట్రోల్ లీటర్ ఒక్కింటికి రూ.111.35 నుంచి 106.35 పైసలకు తగ్గింది. డీజిల్ రూ.97.28 పైసల నుంచి 94.28 పైసలకు క్షీణించింది.

విశాఖపట్నంలో..

కోల్‌కతలో పెట్రోల్ రూ.106.03 పైసలు, డీజిల్ రూ.92.76 పైసలుగా ఉంటోంది. చెన్నైలో పెట్రోల్ రేటు రూ.102.63 పైసలు, డీజిల్ 94.24 పైసలు. బెంగళూరులో పెట్రోల్ రూ.101.94 పైసలు, డీజిల్ రూ.87.89 పైసలుగా ఉంటోంది. లక్నోలో పెట్రోల్ రూ.96.57 పైసలు, డీజిల్ 89.76 పైసలు, విశాఖపట్నంలో పెట్రోల్ రూ.110.48 పైసలు, డీజిల్ 98.38 పైసలుగా నమోదైంది.

వ్యాట్ తగ్గింపు..

అహ్మదాబాద్‌లో పెట్రోల్ రూ.96.63 పైసలు, డీజిల్ 92,38 పైసలు, హైదరాబాద్‌లో పెట్రోల్ రూ.109.66 పైసలు, డీజిల్ రూ.97.82 పైసలు, పాట్నాలో పెట్రోల్ 107.24 పైసలు, డీజిల్ రూ.94.04 పైసలు పలుకుతోంది. తిరువనంతపురంలో పెట్రోల్ 107.87 పైసలు, డీజిల్ రూ.96.67 పైసలుగా నమోదైంది. కేంద్ర ప్రభుత్వం ఎక్సైజ్ డ్యూటీని తగ్గించిన తరువాత మూడు రాష్ట్రాలు మాత్రమే తాము వసూలు చేస్తోన్న విలువ ఆధారిత పన్నును తగ్గించాయి.

ఈ రాష్ట్రాల్లో..

రాజస్థాన్, కేరళ, మహారాష్ట్ర ప్రభుత్వాలు వ్యాట్‌ను కుదించాయి. మహారాష్ట్ర ప్రభుత్వం రెండుసార్లు వ్యాట్ తగ్గించింది. బీజేపీ పాలిత రాష్ట్రాలు సైతం పెట్రోల్, డీజిల్ ధరలపై అమలు చేస్తోన్న వ్యాట్‌ను తగ్గించడానికి పెద్దగా ఆసక్తి చూపలేదు.. ఇదివరకట్లా. గతంలో కేంద్ర ప్రభుత్వం ఎక్సైజ్ డ్యూటీని కుదించిన అనంతరం మెజారిటీ రాష్ట్రాలు అదే దారిలో నడిచిన విషయం తెలిసిందే.