ఈవీ మార్కెట్‌లోకి.. ఇండియాలోనే ఫోర్డ్, పీఎల్ఐ స్కీంకు థ్యాంక్స్

భారత మార్కెట్ నుండి వైదొలుగుతున్నట్లు గత ఏడాది ప్రకటించిన కార్ మ్యానుఫ్యాక్చరింగ్ దిగ్గజం ఫోర్డ్ యూటర్న్ తీసుకున్నది. మన దేశంలో కార్ల ఉత్పత్తిపై పునరాలోచనలో పడినట్లుగా కనిపిస్తోంది. భారత్‌తో పాటు ప్రపంచవ్యాప్తంగా ఎలక్ట్రిక్ కార్ల తయారీకి ప్రణాళిక రూపొందిస్తోంది. విద్యుత్ కార్ల తయారీపై లబ్ధి పొందేందుకు పీఎల్ఐ స్కీమ్ కోసం ఫోర్డ్ మోటార్స్ దరఖాస్తు చేసుకుంది. ఫోర్డ్‌‌తో పాటు మారుతీ సుజుకీ సహా 20 కార్ల తయారీ సంస్థలు పీఎల్ఐ స్కీమ్ కోసం దరఖాస్తులు చేసుకున్నాయి.

దేశీయంగా విద్యుత్ వాహనాలను తయారీ చేసి, విక్రయించిన సంస్థలకు కేంద్రం పీఎల్ఐ కింద రూ.25,938 కోట్ల మేరకు లబ్ధి చేకూరుస్తుంది. గుజరాత్‌లోని సనద్ ప్లాంట్ కలిగి ఉన్న ఫోర్డ్ అక్కడి నుండి వంద శాతం ఎలక్ట్రిక్ కార్ల తయారీతో పాటు విదేశాలకు ఎగుమతి చేయాలని సంకల్పించింది.

పీఎల్ఐ కింద ఫోర్డ్ సమర్పించిన దరఖాస్తుకు కూడా కేంద్రం ఆమోదం తెలిపింది. తమ ప్రతిపాదనకు ఆమోదం తెలిపినందుకు ఫోర్డ్ ఇండియా కేంద్రానికి సోషల్ మీడియా వేదికగా థ్యాంక్స్ తెలిపింది. కేంద్రం ఆమోదం పొందిన సంస్థలు వచ్చే రెండేళ్లలో స్ట్రాటెజీ, ప్రోడక్ట్స్ మీద దృష్టి సారిస్తాయి. 2024 నుండి అయిదేళ్ల పాటు పీఎల్ఐ స్కీమ్ అమలవుతుందని తెలిపింది.