'స్విస్ ఖాతాల వివరాలు ఇవ్వలేం, గోప్యంగా ఉంచాలని నిబంధన'

న్యూఢిల్లీ: స్విస్ బ్యాంకుల్లో నల్లధనం దాచుకున్న భారతీయుల ఖాతాల వివరాలు సమాచార హక్కు చట్టం కింద ఇవ్వలేమని ఆర్థిక శాఖ స్పష్టం చేసింది. అలాగే ఇతర దేశాల నుంచి వచ్చిన బ్లాక్ మనీ వివరాలు కూడా ఇవ్వలేమని తెలిపింది. గోప్యంగా ఉంచాలన్న నిబంధనతో స్విట్జర్లాండుతో కుదిరిన ఒప్పందం నేపథ్యంలో ఈ వివరాలు ఇవ్వలేమని చెప్పింది. పీటీఐకి చెందిన రిపోర్టర్ ఆర్టీఐ కింద దర్యాఫ్తు చేసుకున్నారు.

రెండు దేశాల మధ్య కుదిరిన ఒప్పందం ప్రకారం సంబంధిత సమాచారం గోప్యంగా ఉంచాల్సి ఉందని తెలిపింది. కాబట్ట పన్ను సంబంధిత వివరాలు, ఇతర దేశ ప్రభుత్వాల నుంచి వచ్చిన వివరాలు ఆర్టీఐలోని 8 (1) (a) and 8 (1) (f) కింద మినహాయింపు ఉందని పేర్కొంది.

స్విస్ బ్యాంకుల నుంచి నల్లధనం తెప్పించేందుకు కేంద్ర ప్రభుత్వం చర్యలు తీసుకుంటోన్న విషయం తెలిసిందే. ఇందులో భాగంగా ఇప్పటికే పలువురి పేర్లు స్విస్ బ్యాంకు నుంచి భారత ప్రభుత్వానికి అందాయి. ఈ ఏడాది సెప్టెంబర్ నెలలో అక్కడి ఫెడరల్ ట్యాక్స్ అడ్మినిస్ట్రేషన్ నుంచి తొలి విడత సమాచారం భారత్‌కు చేరింది. ఇందులో ఎక్కువగా క్లోజ్ అయిన ఖాతాల సమాచారమే ఉంది.