ఇండియాలో పసిడిపై ప్రేమ తగ్గటానికి, బంగారం డిమాండ్ 25 ఏళ్ళ కనిష్టానికి పడిపోవటానికి కారణాలివే !!

బంగారం కొనుగోలులో, బంగారు ఆభరణాల వినియోగంలో భారతదేశం ముందు వరుసలో ఉంటుంది. అటువంటి భారతదేశంలోనూ 2020లో బంగారం డిమాండ్ 35 శాతం క్షీణించి 25 ఏళ్ల కనిష్టానికి పడిపోయింది అంటే అందుకు కారణాలు సవాలక్ష. ఇక ఇండియాలోనే కాకుండా ప్రపంచ వ్యాప్తంగా బంగారం డిమాండ్ బాగా తెగ్గింది.

కరోనా కారణంగా ప్రజల ఆర్ధిక స్థితి అల్లకల్లోలం .. బంగారం కొనుగోలుపై అనాసక్తి

2020లో ప్రపంచం మొత్తం కరోనా మహమ్మారి విజృంభణ కారణంగా తీవ్ర ఆర్థిక సంక్షోభాన్ని ఎదుర్కొంది. కరోనా కారణంగా ప్రపంచవ్యాప్తంగా అత్యంత ప్రభావితమైన దేశాలలో భారతదేశం కూడా ముందు వరుసలో ఉంది. భారతదేశంలో కరోనా కారణంగా ఆర్థిక వ్యవస్థ అస్తవ్యస్తమైంది. దేశం ఆర్థిక సంక్షోభంలో చిక్కుకుంది. సంపన్నుల నుండి సామాన్యుల వరకు ప్రతి ఒక్కరూ ఆర్థిక కష్టాలలో కూరుకుపోయారు. కరోనా కారణంగా ఎన్నో నష్టాలను చవి చూశారు. ఇక ఇలాంటి సమయంలో ఊహించని విధంగా బంగారం ధరలు పెరుగుదల కూడా బంగారం పై ఒక రకంగా విముఖతను పెంచాయి.

సామాన్య మధ్యతరగతి ప్రజలు తాము కొనుగోలు చెయ్యలేనంతగా పెరుగిన ధరలు

గతంలో ఎన్నడూ లేనివిధంగా బంగారం ధరలు పెరగడం సామాన్య, మధ్యతరగతి ప్రజలు తాము కొనుగోలు చెయ్యలేము అనే భావనకు వచ్చేలా చేశాయి. బంగారానికి బదులుగా ఇమిటేషన్ జ్యువలరీని కొనుగోలు చేసి వాటితోనే నడిపించేస్తున్నారు. సామాన్యుడు కొనలేని ధరాఘాతం నేపథ్యంలో కొంత బంగారంపై విముఖత పెరగగా, కరోనా కారణంగా ఆర్థికంగా దెబ్బతిన్న కుటుంబాలు ఇంకా పూర్తిగా కోలుకోలేదు. రోజువారీ ఖర్చులు, సాధారణ జీవితమే కష్టంగా కొనసాగుతోంది. ఇక ఇలాంటి పరిస్థితుల్లో బంగారం పైన ఎవరూ ఆసక్తి చూపించడం లేదు అనేది నిర్వివాదాంశం.

బంగారంపై మక్కువ చూపకపోవటానికి కారణాలివే

అందుకే గతంలో లేనివిధంగా బంగారం డిమాండ్ భారత్లో విపరీతంగా తగ్గింది. అందుకు కరోనా ప్రధాన కారణం కాగా అధిక ధరలు డిమాండ్ ను అనూహ్యంగా తగ్గించేశాయి .ఒక్క భారత దేశంలోనే కాకుండా ప్రపంచ వ్యాప్తంగా బంగారానికి అదేస్థాయిలో డిమాండ్ పడిపోయింది. బంగారంపై ఎవరూ పెద్దగా మక్కువ చూపుతున్న దాఖలాలు కనిపించటంలేదు. కరోనా నుండి,ఆర్థిక సంక్షోభం నుండి బయట పడితే మళ్లీ పరిస్థితులు సాధారణంగా మారుతాయని, ప్రజలు బంగారం కొనుగోలు ఎక్కువ ఆసక్తి చూపుతారని జువెలరీ షాప్ నిర్వాహకులు ఆశాభావం వ్యక్తం చేస్తున్నారు.