EPFO పెన్షన్ డబ్బులు పెరుగుతున్నాయా? క్లారిటీ ఇచ్చిన కేంద్రం!

దేశవ్యాప్తంగా ఉన్న లక్షలాది మంది ప్రైవేట్ రంగ ఉద్యోగులు, EPFO పెన్షనర్లు ఎంతో కాలంగా ఎదురుచూస్తున్న EPS-95 కనీస పెన్షన్ పెంపుపై కేంద్ర ప్రభుత్వం కీలక వివరణ ఇచ్చింది. పెన్షన్ మొత్తాన్ని పెంచుతారని ఆశించిన వారికి ప్రభుత్వం నుండి వచ్చిన సమాధానం కొంత నిరాశ కలిగించేలా ఉంది. ప్రస్తుతం అందుతున్న రూ. 1,000 కనీస పెన్షన్‌ను ఇప్పట్లో పెంచే ఆలోచన లేదని కేంద్ర కార్మిక శాఖ మంత్రి స్పష్టం చేశారు.

పార్లమెంట్‌లో మంత్రి ఏమన్నారంటే?

ఇటీవల పార్లమెంట్‌లో అడిగిన ఒక ప్రశ్నకు సమాధానంగా కేంద్ర మంత్రి మన్సుఖ్ మాండవీయ ఈ అంశంపై మాట్లాడారు. EPS నిధి భవిష్యత్తులో ఆర్థికంగా నిలకడగా ఉండాలనే ఉద్దేశంతోనే కనీస పెన్షన్ మొత్తాన్ని ప్రస్తుతానికి మార్చడం లేదని ఆయన వివరించారు. ప్రభుత్వం ఇప్పటికే బడ్జెట్ నుంచి అదనపు నిధులను కేటాయించి అర్హులైన రిటైర్డ్ ఉద్యోగులకు నెలకు రూ. 1,000 కనీస పెన్షన్‌ను గ్యారెంటీగా ఇస్తోందని ఆయన గుర్తు చేశారు.

సాధారణంగా ప్రభుత్వం పెన్షన్ ఫండ్‌కు 1.16 శాతం వేతన సహకారాన్ని అందిస్తుంది. దీనికి అదనంగా ఈ కనీస పెన్షన్ భారాన్ని కూడా ప్రభుత్వమే భరిస్తోందని మంత్రి పేర్కొన్నారు. భవిష్యత్తులో పెన్షన్ పెంచాలంటే ఫండ్ ఆర్థిక స్థితిగతులు చాలా బలంగా ఉండాలని, ప్రస్తుతం ఆ దిశగా సమీక్షలు జరుగుతున్నాయని ఆయన తెలిపారు.

ఈపీఎస్ (EPS) ఎలా పనిచేస్తుంది?

ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) ఆధ్వర్యంలో నడిచే EPS-95 పథకం ద్వారా ప్రైవేట్ రంగంలో పనిచేసే ఉద్యోగులకు 58 ఏళ్లు నిండిన తర్వాత జీవితాంతం పెన్షన్ అందుతుంది.

• ఈ పథకంలో ఉద్యోగి తన జీతం నుంచి నేరుగా రూపాయి కూడా జమ చేయడు.
• యజమాని చెల్లించే 12 శాతం పీఎఫ్ వాటాలో 8.33 శాతం EPS ఖాతాలోకి వెళ్తుంది (గరిష్టంగా రూ. 15,000 బేసిక్ జీతంపై లెక్కిస్తారు).
• కేవలం రిటైర్మెంట్ మాత్రమే కాకుండా, ముందస్తు పదవీ విరమణ, వైకల్యం, వితంతువు , కుటుంబ పెన్షన్ ప్రయోజనాలు కూడా దీని ద్వారా లభిస్తాయి.

పెన్షనర్ల డిమాండ్ ఏంటి?

గత కొన్నేళ్లుగా పెరుగుతున్న నిత్యావసర ధరల దృష్ట్యా, నెలకు రూ. 1,000 పెన్షన్ ఏ మూలకూ సరిపోవడం లేదని రిటైర్డ్ ఉద్యోగుల సంఘాలు ఆందోళన వ్యక్తం చేస్తున్నాయి. కనీస పెన్షన్‌ను రూ. 5,000 నుండి రూ. 7,500 కు పెంచాలని వారు డిమాండ్ చేస్తున్నారు. సుప్రీంకోర్టులో కూడా దీనిపై పలు దఫాలుగా విచారణలు జరిగాయి. అయితే, పెన్షన్ ఫండ్‌లో లోటు ఉండటం , ఆర్థిక భారంతో నిధి కుప్పకూలే ప్రమాదం ఉందని అధికారులు భయపడుతున్నారు.

మొత్తంగా చూస్తే.. ప్రభుత్వం పెన్షన్ పెంచడానికి నిరాకరించలేదు. కానీ, ఆర్థిక స్థిరత్వాన్ని కారణంగా చూపుతూ ప్రస్తుతానికి పాత పద్ధతినే కొనసాగిస్తోంది. భవిష్యత్తులో ఉద్యోగుల బేసిక్ జీతం పరిమితిని పెంచితే తప్ప EPS పెన్షన్ పెరిగే అవకాశాలు తక్కువగా కనిపిస్తున్నాయి.