షాకిచ్చిన ఎలిజబెత్, రూ.83,624 కోట్ల పన్ను చెల్లిస్తున్నానని ఎలాన్ మస్క్

ప్రపంచ కుబేరుడు, టెస్లా అధినేత ఎలాన్ మస్క్ ఈ సంవత్సరం పన్ను రూపంలో ఎంత చెల్లించనున్నారో తెలుసా? మస్క్ పన్నులు చెల్లించడం లేదనే విమర్శలు వెల్లువెత్తిన విషయం తెలిసిందే. ఈ నేపథ్యంలో టెస్లా, స్పేస్ ఎక్స్ సహా ఇతర వెంచర్స్ ద్వారా ఆర్జిస్తున్న రాబడులకు తగిన పన్నులు చెల్లించడం లేదనే విమర్శలకు చెక్ పెట్టారు. ఈ ఏడాది తన రాబడుల పైన తాను పన్ను చెల్లిస్తున్నానని చెప్పడంతో పాటు, ఎంత మేర చెల్లిస్తున్నదీ వెల్లడించారు. ఈ సంవత్సరం తాను రూ.83,624 కోట్లను పన్నుల కింద చెల్లిస్తానని ఎలాన్ మస్క్ తెలిపారు.

విమర్శలకు ధీటుగా..

మస్క్ తాను చెప్పినట్లుగా ఇంత పెద్ద మొత్తం చెల్లిస్తే అమెరిక‌న్ ఇంట‌ర్న‌ల్ రెవెన్యూ స‌ర్వీస్‌కు ఇప్ప‌టివ‌ర‌కు స‌మ‌కూరిన భారీ ట్యాక్స్ ఫైలింగ్ ఇదే అవుతుంది. తాను ప‌న్నులు చెల్లించ‌డం లేద‌ని చెబుతున్న వారి కోసం ఈ వివ‌రాలు వెల్లడిస్తున్నానని తెలిపారు. ఈ ఏడాది తాను 1100 కోట్ల (రూ 83,624 కోట్లు) డాల‌ర్ల ప‌న్ను చెల్లిస్తాన‌ని ట్వీట్ ద్వారా తెలిపారు. మస్క్ సరైన విధంగా పన్నులు చెల్లించడం లేదని మసాచుసెట్స్ సెనేటర్ ఎలిజబెత్ వారెన్ అన్నారు. దీనిపై మస్క్ వ్యాఖ్యానిస్తూ చరిత్రలో ఏ అమెరికన్ చెల్లించని విధంగా తాను పన్నులు అధికంగా చెల్లిస్తున్నానన్నారు.

ఏటిమేటి వ్యక్తికి చురక

ఇటీవల టైమ్ మేగజైన్ ఈ ఏటి మేటి వ్యక్తిగా ఎలాన్ మస్క్‌ను ప్రకటించింది. దీనిపై సోషల్ మీడియాలో ప్రశంసల వర్షం కురిసింది. అదే సమయంలో పన్నులను ఎగవేస్తున్నట్లు విమర్శల జడివాన మొదలైంది. ఎలిజబెత్ వారెన్ ట్వీట్ చేస్తూ పన్నులను ఎగవేసే పద్ధతిని మారుద్దామని పేర్కొంటూ, ది పర్సన్ ఆఫ్ ది ఇయర్ ఈసారి వాస్తవ పన్నులు చెల్లిస్తారంటూ పరోక్షంగా ఎలాన్ మస్క్‌ను ఉద్దేశించి వ్యాఖ్యానించారు. సెనేటర్ చేసిన వ్యాఖ్యలకు మస్క్ పైవిధంగా బదులిచ్చారు.

టెస్లా మార్కెట్ వ్యాల్యూ

ఇక ఈ ఏడాది ఒక్క టెస్లా మార్కెట్ వ్యాల్యూ దాదాపు లక్ష కోట్ల (1 ట్రిలియన్) డాలర్ల మార్కును దాటింది. దీని వ్యాల్యూ ఫోర్డ్ మోటార్స్, జనరల్ మోటార్స్ రెండింటి వ్యాల్యూ కంటే ఎక్కువ కావడం గమనార్హం. గతకొన్ని వారాలుగా టెస్లా షేర్లను విక్రయిస్తోన్న ఆయన, ఇప్పటికే దాదాపు 14 బిలియన్ డాలర్ల విలువైన షేర్లను విక్రయించారు.