Philips: ఉద్యోగులను తొలగించిన ఫిలిప్స్ కంపెనీ.. దానివల్లే కంపెనీకి ఈ గతి పట్టింది..!

Philips: 90లలో పుట్టిన వారి నుంచి నేటి తరం వారికి సైతం పరిచయం ఉన్న కంపెనీ ఫీలిప్స్. ఇదొక డచ్ కంపెనీ. దశాబ్ధాలుగా భారత్ లో నిరాటంకంగా కంపెనీ వ్యాపారాన్ని నిర్వహిస్తోంది. అయితే ఇప్పుడు దీనికి వచ్చిన కష్టం వల్ల ఉద్యోగులను తొలగించాల్సి వచ్చింది. అసలు కంపెనీకి భారీగా నష్టాలు రావటానికి గల కారణం ఏమిటో చూద్దాం.

కంపెనీ వ్యాపారం..

సాధారణంగా మనందరికీ ఫిలిప్స్ గృహోపకరణాలు, ఎలక్ట్రికల్స్, లైటింగ్ వంటి వస్తువులను అమ్ముతుందని తెలుసు. అయితే ఈ కంపెనీ ఎక్కువగా వైద్య పరికరాలను తయారు చేయటంలో ఫేమస్. అయితే ప్రస్తుతం కంపెనీ 4,000 మంది ఉద్యోగులను తొలగిస్తున్నట్లు సోమవారం ప్రకటించింది. కంపెనీకి భారీగా నష్టాలు రావటంతో ఈ నిర్ణయం తీసుకున్నట్లు తెలుస్తోంది. ప్రపంచ వ్యాప్తంగా 100 దేశాల్లో వ్యాపారం చేస్తున్న ఈ కంపెనీకి దాదాపు 80,000 మంది ఉద్యోగులు ఉన్నారు.

నష్టాలు తెచ్చింది ఇదే..

స్లీప్ అప్నియా ఉన్న వినియోగదారుల కోసం స్లీప్ రెస్పిరేటర్లను తయారు చేసింది. అయితే ఈ పరికరాలు లోపభూయిష్టంగా ఉండటం వల్ల కంపెనీ దాదాపు 1.3 బిలియన్ యూరోల నష్టాన్ని చవిచూడాల్సి వచ్చినట్లు ఒక ప్రకటనలో వెల్లడించింది. ఇది కంపెనీకి భారీ ఆర్థిక నష్టం అని చెప్పుకోవాలి. మునుపటి సీఈవో 12 ఏళ్లు కంపెనీని ఎలక్ట్రానిక్స్ నుంచి వైద్య పరికరాల తయారీదారుగా మార్చిన తర్వాత ఈ ఏడాది పదవీవిరమణ చేశారు. ఇప్పటికే కంపెనీ లోపభూయిష్ట పరికరాల నష్టాన్ని పూడ్చేందుకు 900 మిలియన్ యూరోలను కేటాయించింది.

చీఫ్ ఎగ్జిక్యూటివ్ మాట..

ప్రస్తుతం కంపెనీ పనితీరును మెరుగుపరచటం తన ముందు ఉన్న ప్రధమ కర్తవ్యవమని కొత్త చీఫ్ ఎగ్జిక్యూటివ్ రాయ్ జాకోబ్స్ అన్నారు. దీనివల్ల తాము వేగంగా రోగులు, వినియోగదారులు, కస్టమర్లతో పాటు ఇతర వాటాదారుల నమ్మకాన్ని పునర్నిర్మించడం ప్రారంభించగలమని చెప్పారు. వాటాదారులందరికీ విలువ సృష్టించేందుకు అనుగుణంగా కంపెనీ పనితీరును మార్చటానికి, లాభదాయకతను పెంచటానికి తాను కృషి చేస్తున్నట్లు ఆయన వెల్లడించారు.

గత ఏడాది లాభాలు..

ఫిలిప్స్ గత ఏడాది మూడవ త్రైమాసికంలో 3 బిలియన్ యూరోల నికర లాభాన్ని నమోదు చేసింది. అయితే ప్రస్తుతం అమ్మకాలు తగ్గటానికి సరఫరా గొలుసు వ్యవస్థలో సమస్యలు కారణమని కంపెనీ తెలిపింది. దీనికి తోడు అతర్జాతీయంగా ఉన్న ఒత్తిళ్తు, రాజకీయ పరిణామాలు, ఆర్థిక మందగమనం వ్యాపారాన్ని ప్రభావితం చేస్తున్నాయని కంపెనీ వెల్లడించింది. అందువల్లే మెుత్తం ఉద్యోగుల్లో 5 శాతం మందిని తొలగించాల్సి వచ్చినట్లు స్పష్టం చేసింది.