జ్యూయెలరీ కొన్నప్పుడు ఒక చిన్న పొరపాటు కూడా ఇన్‌కమ్ ట్యాక్స్ రావడానికి కారణం కావచ్చు అని ఊహించారా?

బంగారం కొనడం అంటే మనలో చాలా మందికి ఆనందం. కానీ, ఒక చిన్న పొరపాటు ఇన్‌కమ్ ట్యాక్స్ డిపార్ట్‌మెంట్ తలుపు తట్టేలా చేస్తుందని ఊహించారా? బెంగళూరులో జరిగిన ఒక నిజమైన కేస్ ఈ విషయాన్ని బలంగా గుర్తు చేసింది అదే బిల్ దాచకపోవడం.

2019లో బెంగళూరులో ఒక వ్యక్తి ఇంటి పై ఇన్‌కమ్ ట్యాక్స్ శాఖ తనిఖీ చేసింది. ఆ తనిఖీలో అధికారులు సుమారు రూ. 1.65 కోట్ల విలువైన బంగారం, వెండి ఆభరణాలు కనుగొన్నారు. ఆ వ్యక్తి చెప్పాడు "ఇవి నా భార్యవే, మేము ఇవన్నీ క్రెడిట్ కార్డ్ లేదా ఆన్‌లైన్ ద్వారా కొన్నాం" అని. కానీ ఆయన చూపించిన బిల్లులు, సీజ్ చేసిన ఆభరణాలతో సరిపోలేదు. అంటే బరువు, డిజైన్ లేదా విలువలో తేడా ఉంది. అందుకే ఇన్‌కమ్ ట్యాక్స్ అధికారులు ఇవి 'వివరణ లేని ఆస్తులు' (Unexplained Investments) అని పేర్కొన్నారు. దాంతో ఆ ఆభరణాల మొత్తం విలువను ఆయన ఆదాయంలో జోడించి పన్ను విధించారు. అంటే బిల్లులు సరిగా లేకపోతే లేదా సాక్ష్యాలు సరిపోకపోతే, అది పెద్ద పన్ను సమస్యగా మారుతుంది.

ఆ వ్యక్తి ఈ నిర్ణయాన్ని అంగీకరించలేదు. వెంటనే ఇన్‌కమ్ ట్యాక్స్ కమిషనర్ (అపీల్స్) దగ్గర అప్పీల్ చేసాడు. అక్కడ ఆయనకు అనుకూలంగా తీర్పు వచ్చింది. కానీ, ట్యాక్స్ డిపార్ట్‌మెంట్ మాత్రం ఆ తీర్పుతో సంతృప్తి చెందలేదు. కేసును మరోసారి ఇన్‌కమ్ ట్యాక్స్ అప్పెలేట్ ట్రిబ్యునల్ (ITAT) వద్దకి తీసుకెళ్లింది. అక్కడ మాత్రం ఆ వ్యక్తి కి మళ్లీ విజయం లభించింది. ట్రిబ్యునల్ స్పష్టంగా చెప్పింది "ఆభరణాలు ఇప్పటికే ఆయన భార్య యొక్క ఇన్‌కమ్ ట్యాక్స్ రిటర్న్‌లో పేర్కొనబడ్డాయి. ఒకే ఆస్తిని రెండుసార్లు పన్ను విధించడం చట్ట విరుద్ధం."దాంతో ఆ వ్యక్తి కు ఊరట లభించింది.

ఇందులో మనకు నేర్చుకోవాల్సినది ఏమిటి?
ఈ కేస్‌ మనకు ఒక ముఖ్యమైన పాఠం చెబుతోంది. క్రెడిట్ కార్డ్ లేదా ఆన్‌లైన్ ద్వారా కొన్నామని చెప్పడం మాత్రమే సరిపోదు. మీరు కొనుగోలు చేసిన వస్తువులకు సంబంధించిన బిల్లులు, చెల్లింపు రశీదులు, బ్యాంక్ స్టేట్మెంట్‌లు అన్నీ సురక్షితంగా ఉంచుకోవాలి. ఎందుకంటే, ఇన్‌కమ్ ట్యాక్స్ అధికారులు బిల్లులు లేకపోతే లేదా సాక్ష్యాలు సరిగా లేకపోతే, ఆ వస్తువులను "వివరణ లేని ఆస్తులు"గా పరిగణించవచ్చు. అప్పుడు మీరు నిజంగానే చెల్లించినా కూడా, పన్ను సమస్యలు ఎదురయ్యే అవకాశం ఉంటుంది.

నిపుణుల సలహా ఏమంటుంది?

చార్టర్డ్ అకౌంటెంట్ సురేష్ సురానా ఏం చెబుతున్నారంటే ఎవరికైనా బంగారం, వజ్రాలు, ఆర్ట్ వర్క్ లేదా లగ్జరీ వస్తువులు కొంటే, వాటి బిల్లులు తప్పనిసరిగా ఉంచుకోవాలి ఎందుకంటే ఇవే ట్యాక్స్ విచారణ సమయంలో మీకు రక్షణగా ఉంటాయి. అలాగే, కుటుంబ సభ్యుల ఆస్తులు లేదా వారసత్వంగా వచ్చిన ఆస్తుల వివరాలు కూడా ఇన్‌కమ్ ట్యాక్స్ రిటర్న్‌లో స్పష్టంగా చూపించడం చాలా ముఖ్యం.

ఈ బెంగళూరు కేస్ మనందరికీ ఒక గోల్డెన్ రూల్ నేర్పుతోంది. డిజిటల్ పేమెంట్ చేసినా, బిల్ తప్పక దాచుకోవాలి. బిల్ లేకుంటే ఇన్‌కమ్ ట్యాక్స్ అధికారులు అది "సందేహాస్పద ఆస్తి"గా చూడవచ్చు. కానీ బిల్ ఉంటే, మీరు పూర్తిగా సురక్షితంగా ఉంటారు. కాబట్టి, ఇక మీదట బంగారం కొన్నప్పుడు గుర్తుంచుకోండి గోల్డ్ కొంటే బిల్ కూడా గోల్డ్ లాంటిదే.