Dhanteras: హాల్‌మార్కింగ్ బంగారాన్ని మాత్రమే కొనుగోలు చేయండి

ధనతెరాస్-దీపావళి పర్వదినం సమయంలో చాలామంది బంగారం కొనుగోలు చేయడానికి ఆసక్తి చూపుతారు. అయితే పసిడిని కొనుగోలు చేయాలని చూసేవారు కేవలం హాల్‌మార్క్ ఆభ‌ర‌ణాల‌ను మాత్ర‌మే కొనుగోలు చేయాల‌ని కేంద్ర ప్రభుత్వం సూచించింది. కేంద్ర వినియోగ వ్య‌వ‌హారాల విభాగం, బ్యూరో ఆఫ్ ఇండియ‌న్ స్టాండ‌ర్డ్ (BIS) ఈ మేర‌కు మంగ‌ళ‌వారం ప్రకటన విడుదల చేసింది.

BIS రిజిస్ట‌ర్డ్ జ్యువెల్లర్స్ వ‌ద్ద మాత్ర‌మే హాల్ మార్క్ పసిడి, వెండి ఆభ‌ర‌ణాల‌ను కొనుగోలు చేయాల‌ని పేర్కొంది. ఏదైనా సందర్భంలో నేరుగా చూసిన‌ప్పుడు హాల్‌మార్క్ సరిగ్గా కనిపించకుంటే సంబంధిత జ్యువెల్లరీ దుకాణదారుడిని మాగ్నిఫైయింగ్ గ్లాస్ కోసం కోరాల‌ని పేర్కొంది. ఈ ఏడాది జూన్ 23వ తేదీ నుండి హాల్‌మార్క్ బంగారు ఆభ‌ర‌ణాలు మాత్ర‌మే విక్ర‌యించాల‌ని కేంద్రం ఇప్పటికే ఆదేశించింది. దేశ‌వ్యాప్తంగా 256 జిల్లాల్లో హాల్‌మార్క్ ఉన్న 14, 18, 22 క్యారెట్ల బంగారం మాత్ర‌మే కొనుగోలు చేయాల‌ని ఆదేశాలు అమల్లోకి తెచ్చింది. ఈ జిల్లాల్లో మాత్ర‌మే హాల్‌మార్కింగ్ కేంద్రాలు ఉన్నాయి.

అలాగే, కొనుగోలుదారులు తమ బంగారం కొనుగోళ్లపై బిల్లు ఇవ్వాలని వ్యాపారులను కోరాలని కేంద్రం తెలిపింది. BIS మార్క్ కింద క్యారెట్ ప్యూరిటీ, గోల్డ్ ఫిట్‌నెస్, ఆరు నెంబర్స్ అల్ఫాన్యూమరిక్ HUID కోడ్ ఉండాలి.