రెండింతలు పెరిగిన సెకండ్ హ్యాండ్ కార్ల ధరలు, ఎందుకంటే? బ్రిటన్‌లోను అదే పరిస్థితి

కరోనా కారణంగా గత కొద్ది నెలలుగా వాహనాల విక్రయాలు పెరుగుతున్నాయి. ప్రజారవాణాకు భయపడుతున్న వారు తమ కుటుంబాల కోసం కార్లు కొనుగోలు చేస్తున్నారు. కొత్త కార్ల విక్రయాలు కూడా పెరిగినప్పటికీ, ప్రధానంగా సెకండ్ హ్యాండ్ కార్ల విక్రయాలు పెరిగాయి. కొత్త కారు కొనుగోలు చేసే స్తోమత లేనివారు సెకండ్ హ్యాండ్ కారును కొనుగోలు చేసేందుకు మొగ్గు చూపుతున్నారు. కరోనా నేపథ్యంలో ప్రపంచవ్యాప్తంగా సొంత వాహనాలకు డిమాండ్ పెరుగుతోంది. సెప్టెంబర్ క్వార్టర్‌లో మన దేశంలో వాహనాల సేల్స్ పెరిగాయి.

సెకండ్ హ్యాండ్ కార్ల ధరలు పెరిగాయి!

సెకండ్ హ్యాండ్ కార్లు రూ.50వేల నుండి లభిస్తున్నాయి. దీంతో కొనుగోలుకు ఆసక్తి చూపిస్తున్నారు. సాధారణంగా సెకండ్ హ్యాండ్ కార్ల ధరలు చాలా తక్కువగా ఉంటాయి. కానీ ఇప్పుడు వీటికి డిమాండ్ పెరగడంతో ధరలు కూడా పెరుగుతుండటం గమనార్హం. గతంలో రూ.50వేలు పలికిన కారు, ఇప్పుడు రూ.లక్ష వరకు పలుకుతోందట. కరోనా కారణంగా దగ్గరి ప్రయాణానికి ఆటోలు, బస్సుల్లో వెళ్లేందుకు చాలామంది భయపడుతున్నారు. కొత్త కారు కొనుగోలు చేయడానికి ఎక్కువ ఖర్చు అవుతుంది. కాబట్టి ఉపయోగించిన కార్ల వైపు చూస్తున్నారు. కానీ వీటి ధరలు గతంలో కంటే కాస్త పెరిగాయి.

రెండింతలు పెరిగిన సేల్స్

ఇప్పుడు పెట్రోల్, డీజిల్ ధరల్లో పెద్దగా తేడా లేదు. కాబట్టి కొనుగోలుదారులు పెట్రోల్ కార్ల వైపు ఎక్కువగా మొగ్గు చూపుతున్నారట. సెకండ్ హ్యాండ్ కార్ల విక్రయాలు గతంలో కంటే రెండింతలు పెరిగాయ. కొన్నిచోట్ల మూడు నుండి నాలుగు రెట్లు పెరిగిందట. ఎక్కువ మంది రూ.1 లక్ష నుండి రూ.3 లక్షలు ఖర్చు చేసేందుకు సిద్ధంగా ఉన్నారు.

బ్రిటన్‌లోను అదే పరిస్థితి

మనదేశంలోనే కాదు, ప్రపంచవ్యాప్తంగా ఇదే పరిస్థితి. బ్రిటన్‌లో సెప్టెంబర్ నెలలో ఉపయోగించిన కారు సేల్స్ 15 శాతం పెరిగాయని ఓ డేటా వెల్లడిస్తోంది. దీంతో కారు ధరలు పెరగడంతో పాటు వడ్డీ రేటు కూడా పెరిగిందట. ఏఏ కార్ డేటా ప్రకారం సెప్టెంబర్ నెలలో యూజ్డ్ కార్ల కోసం బ్రిటన్‌కు చెందిన 48 పట్టణాలు, నగరాల్లో భారీగా పెరిగిందట. జూన్ నెలతో పోలిస్తే సెప్టెంబర్‌లో 4 శాతం పెరిగింది. గ్లాస్‌గో వంటి పట్టణాల్లో సెకండ్ హ్యాండ్ కార్ల కోసం ఏకంగా 32 శాతానికి పైగా వెతుకుతున్నారట.