LPG Cylinder Prices: పండక్కి గ్యాస్ సిలిండర్ ధర తగ్గింపు.. ఆ వినియోగదారులకు భారీ ఊరట..!

గ్యాస్ ధర మార్పులు..

పండుగల సమయంలో అక్టోబర్ 1న ఎల్‌పీజీ సిలిండర్ల ధరలను చమురు కంపెనీలు మరోమారు తగ్గిస్తున్నట్లు ప్రకటించాయి. ఎల్‌పీజీ సిలిండర్‌ ధరలో ఏకంగా రూ.25.50 తగ్గింపును ప్రకటించాయి. అయితే.. ఈ ధర తగ్గింపు కేవలం వాణిజ్య సిలిండర్లపై మాత్రమే. 14.2 కిలోల డొమెస్టిక్ ఎల్‌పీజీ సిలిండర్ల విషయంలో చమురు కంపెనీలు ఈ నెల ఎలాంటి ప్రకటన చేయలేదు.

దేశంలోని నగరాల్లో తగ్గింపు ఇలా..

అక్టోబర్ 1 నుంచి ఢిల్లీలో 19 కిలోల వాణిజ్య ఇండేన్ సిలిండర్ ధర రూ.91.50, కోల్‌కతాలో రూ.36.50, ముంబైలో రూ.32.50, చెన్నైలో రూ.35.50 తగ్గినట్లు కంపెనీలు వెల్లడించాయి. వాణిజ్య సిలిండర్ల ధరల తగ్గింపు ప్రకటనతో హోటల్ పరిశ్రమ వర్గాలు హర్షం వ్యక్తం చేస్తున్నాయి. గత కొన్ని నెలలుగా వరుస తగ్గింపులు వారికి కొంత ఊరటన కలిగిస్తున్నాయి. అయితే ఈ తగ్గింపు వినియోగదారులకు, ఆహార ప్రియులకు కొంత భారాన్ని తగ్గిస్తుందని పరిశ్రమ వర్గాలు అంటున్నాయి.

తగ్గింపు తర్వాత రేట్లు..

ఈ రోజు చమురు కంపెనీలు ధరలను తగ్గిస్తున్నట్లు ప్రకటించడంతో.. ఢిల్లీలో 19 కేజీల ఎల్‌పీజీ సిలిండర్ ధర రూ.1,885 నుంచి రూ.1,859.50కి తగ్గింది. అదే సమయంలో కోల్‌కతాలో ధర తగ్గాక రూ.1959కి చేరింది. గతంలో ఇది రూ.1995.50గా ఉంది. ముంబైలో సిలిండర్ ధర రూ.1,811.50కి తగ్గగా.. గతంలో అది రూ.1,844గా ఉండేది.

గృహ వినియోగదారులకు నిరాశ..

జూలై 6 నుంచి డొమెస్టిక్ సిలిండర్ల ధరలో ఎలాంటి మార్పు లేదు. అంటే.. సిలిండర్ ధర ఇప్పటికీ అప్పటి రేటుకే అందుబాటులో ఉంటుంది. ఇండేన్ సిలిండర్ ధర ఢిల్లీలో రూ.1,053, కోల్‌కతాలో రూ.1,079, ముంబైలో రూ.1,052, చెన్నైలో రూ.1,068గా కొనసాగుతున్నాయి.

గతంలో తగ్గింపులు ఇలా..

ఆగస్టులో కూడా కమర్షియల్ సిలిండర్ల ధరలను కంపెనీలు తగ్గించారు. అప్పట్లో సిలిండర్ కు రూ.36 తగ్గింపును కంపెనీలు ప్రకటించాయి. జూలైలో సిలిండర్ పై ధర రూ.9 మేర తగ్గింది. అంతకుముందు.. జూన్ లో వాణిజ్య సిలిండర్ ధర రూ.198 తగ్గింది. అలాగే సెప్టెంబర్ మాసంలో రూ.100, అక్టోబర్ నెలలో రూ.25.50 తగ్గింపు వచ్చింది.

దీంతో మెుత్తంగా జూన్ నుంచి ఇప్పటి వరకు వాణిజ్య సిలిండర్ ధర రూ.503.50 తగ్గింది. ఇది కమర్షియ సిలిండర్ వినియోగదారులకు పెద్ద ఊరట. అయితే సహజ వాయువు ధరలు పెరుగుతున్నందున రానున్న కాలంలో సీఎన్జీ, పీఎన్జీ గ్యాస్ ధరలు భారీగా పెరగవచ్చని నిపుణులు చెబుతున్నారు.